Autor: admin

O Saló del Còmic de Barcelona, que chega este ano á súa trixésimo primeira edición, ten de novo unha importante presenza galega.

Así, o noso socio José Domingo, gañador do premio á mellor obra española no Salón do ano pasado, é o protagonista dunha das exposicións centrais, e David Rubín é un dos candidatos ao premio deste ano á mellor obra, por El héroe.

Ambos participan ademais na obra colectiva Tales from the end of the World, novidade esta semana, e asinarán exemplares das súas obras nos stands do Salón (os horarios poden encontrarse aquí); Rubín ademais o fará tamén nas Jornadas Comiqueras Fnac/SD, que se desenvolven paralelamente nestas datas en Barcelona.

A TVG, no seu programa ZigZag Diario, emitiu hai uns días unha entrevista con David Rubín e Miguelanxo Prado, dous dos candidatos ao premio á mellor obra no Salón deste ano. A entrevista pode verse aquí.

Sabor a Artesanía, a xornada que decorrerá en
Santiago este sábado, 6 de abril, conta cun cartel deseñado e ilustrado pola nosa socia Nuria Díaz.

Co subtítulo de «Enogastrorruta de divulgación da nova artesanía de Galicia», en Sabor a Artesanía artesáns de distintas ramas cambiarán os seus obradoiros
habituais por algúns dos mellores locais de hostalería do casco
histórico, e ademais de coñecer as súas pezas e forma de traballo,
poderase degustar nos distintos restaurantes e vinotecas colaboradoras un «pack artesán» preparado ao efecto.

A coincidir coa celebración do Día Internacional do Libro Infantil e Xuvenil, Edicións Xerais presentou antonte as súas novidades de máis próxima publicación.

Como non podía ser doutra forma, na maior parte deles a ilustración ten unha grande importancia, e ademais, en todos os casos se trata de socios da AGPI: así, O señor Corpo quere xogar, escrito por Alicia Borrás Sanjurjo, está ilustrado por Rodrigo Chao; O aprendiz de home do saco, con texto de Antonio Reigosa, foi ilustrado por Marta Álvarez Miguéns; O merlo de ferro, de Antón Cortizas, vén ilustrado por Xosé Cobas; O gato fantasma, de Xelís de Toro, por Almudena Aparicio Andión; e As palabras do silencio, de Ánxela Gracián, por Dani Padrón. Finalmente, Desde unha estrela distante, de Agustín Fernández Paz, está ilustrado por David Pintor, e Os Sabuxos entran na casa do pé esquerdo, de Jaureguizar, por Matalobos.

Como adiantabamos ao anunciar o novo curso AGPI (que traerá a Santiago a José Luis Ágreda para falar sobre entintado manual e dixital), este sábado, 6 de abril, a partir das 23:00 h chegará tamén o segundo IlustraNoite, que fará de peche da xornada, organizado igualmente por AGPI.

O IlustraNoite segue un formato 20 × 20, é dicir, cada convidado presenta 20 imaxes e dedícalles 20 segundos a cada unha delas. Nesta ocasión, a tarefa de comisariado recaeu sobre Óscar Villán —tamén autor do cartel—, que escolleu oito autores: Nuria Díaz, Mariano Casas, Fran Bueno, Jorge García, Diego F. Goberna, Jose L. Serrano Silva ‘Arteaga’, Yago García e Minia Regos.

Trátase dun espazo informal de intercambio e contacto directo con outros colegas de profesión. Nesta ocasión, terá lugar na Cantina Galopín (rúa Fernando III o Santo 1, 15701 Santiago de Compostela), e a entrada será libre e gratuíta.

O noso socio Jaime Asensi presenta a adaptación que fixo da obra de Ramón J. Sender El fugitivo sobre o guión do xornalista Hans Leuenberger.

Así, guionista e debuxante estarán mañá, xoves 4 de
abril, no acto de presentación que terá lugar ás 20:00 h na Libraría Paz (rúa da Peregrina 29, 36001 Pontevedra), e mais o venres, 5 de abril, ás
20:30 h, na Casa da Cultura de Brión (Carballeira de Santa Minia 5, 15865 Brión).

Neste enlace pode lerse a crítica publicada hoxe mesmo polo especialista Ramón Nicolás acerca desta adaptación.

Mañá, xoves 4 de abril, a Galería Sargadelos de Santiago (rúa Nova 16, 15705 Santiago de Compostela) acolle ás 19:00 h un encontro co ilustrador Emilio Urberuaga, Premio Nacional de Ilustración 2011 e membro do xurado do VI Premio Internacional Compostela de Álbums Ilustrados.

O encontro está organizado polo Departamento de Educación do Concello de Santiago e mais Kalandraka Editora.

A exposición Parafusos, alambiques e birleques, que puido visitarse ata o pasado día 23 dentro da programación do Salón do Libro Infantil e Xuvenil de Pontevedra, e que dispón de versión dixital no espazo Flickr da AGPI, recibiu destaque hoxe en CulturaGalega.org, a web de divulgación do Consello da Cultura Galega. O artigo publicado, que recolle ademais varias das ilustracións, pode verse nesta ligazón.

Parafusos, alambiques e birleques é unha mostra composta por obras de 16 socios da AGPI; concretamente, Aida Alonso Vázquez, Alberto García Ariza, Almudena Aparicio, Antonio Seijas, Carmen Ferrín, Dani Padrón, Eduardo Baamonde, José Souto Josiño, Manuel Lariño, Marina Seoane Pascual, Nuria Díaz, Pirusca, Quico, Rebecalópez, Rubén Mariño Lamas e Yago García Rodríguez Yaguete.

O catálogo Galician Books for Children & Young Adults 2013, que inclúe as 144 novidades de 40 editoriais galegas publicadas ao longo do pasado ano, serve de carta de presentación das firmas e mais dos autores en feiras internacionais como as de Boloña, Bos Aires, Guadalaxara ou Frankfurt. Como é natural, inclúense nel traballos de boa parte dos socios da AGPI. A ilustración das capas corresponde ademais ao noso socio Antonio Seijas.

O libro, á parte de editado en papel, tamén está dispoñible na rede, e pode descargarse nesta ligazón.

O xornal La Opinión A Coruña recollía, o pasado día 20, unha ampla entrevista ao noso socio Suso Cubeiro. Co título de «Fantasía y lápiz», a xornalista Lourdes Varela debulla a súa traxectoria artística e profesional. Non quedan fóra da entrevista as súas preocupacións sobre as reivindicacións profesionais —de feito, Suso Cubeiro é un dos fundadores da AGPI—, e, preguntado sobre os avances nestes últimos anos, destaca que «o principal cambio foi o recoñecemento da autoría da obra», ao que engade: «Hai quince anos, as editoriais só consideraban autor a quen escribía o texto, e isto incluía os álbums ilustrados».

Hoxe comeza a 50.ª edición da Feira Internacional do Libro Infantil e Xuvenil de Boloña. O noso socio David Pintor participa na prestixiosa «Mostra degli Illustratori», e o mércores 27 nunha mesa redonda na sección Authors Café —cos gañadores e organizadores do concurso do Festival Nami Island—, ademais de asinar exemplares do seu novo álbum ilustrado, L’Eco, escrito por Alessandro Riccioni. A sesión de autógrafos será o no stand P26-B31, ás 16:00 h.

L’Eco é un album ilustrado que David Pintor entende como a súa «particular homenaxe á Toscana e ao filme O ladrón de bicicletas, de Vittorio de Sica». Nel, un neno e o seu pai saen de excursión, e percorren as paisaxes toscanas ata chegaren a unha montaña, onde comezan a xogar co eco.

Actualización: David Pintor falou sobre a súa presenza en Boloña no programa de Radio 3 La hora del bocadillo o pasado sábado. O podcast do programa pode escoitarse aquí (a entrevista con David comeza no minuto 33).