Autor: admin

O blog especializado Fervenzas Literarias acaba de facer pública a lista dos mellores libros de 2013, que como cada ano son resultado da votación dos seus lectores.

Nos capítulos relacionados coa ilustración, o mellor libro de literatura infantil e xuvenil é Un rato díxolle á lúa, escrito por Antonio García Teijeiro e ilustrado polo noso socio Xosé Cobas; o mellor álbum de banda deseñada, Operario, de Jano; e a mellor portada de literatura infantil e xuvenil é a de Pan de millo, a cargo do noso socio Dani Padrón.

O que foi considerado o mellor ilustrador é o tamén socio noso Manel Cráneo; hai que dicir que nesta última categoría todos os postos están ocupados por socios da AGPI: Antonio Seijas, David Pintor, Xosé Tomás e Dani Padrón.

O próximo xoves, 9 de xaneiro, ás 20:00 h, a charla «Creando Rosalías» tentará afondar na relación entre música, poesía e artes plásticas a través de dúas obras: o libro-disco Rosalía pequeniña —de Uxía Senlle, con ilustracións da nosa socia Marina Seoane— e o libro-disco Na lingua que eu falo —de Najla Shami, con fotografías de Ainoa Calvo—. Os participantes terán a oportunidade de desentrañar con estas catro artistas o proceso creativo destas obras, tratando todas as fases do seu traballo.

Esta actividade forma parte do programa do festival Cantos na Maré, e terá lugar na Casa das Campás (rúa Don Filiberto 9-11, 36002 Pontevedra), con acceso libre e gratuíto.

Esta tarde preséntase a primeira entrega de Historias de Betanzos, un proxecto en que o noso socio Xosé Tomás leva a traballar desde hai máis de dez anos.

Trátase de historias en banda deseñada, con debuxo e guión a cargo de Xosé, mais con documentación histórica preparada por José Raimundo Núñez-Varela, cronista oficial de Betanzos. O libro vai acompañado dun caderniño de traballo para rapaces, que afonda en contidos históricos, e de maneira especial na banda deseñada, no debuxo, na creación de personaxes, etcétera.

A presentación é hoxe, venres 27, ás 20:30, no edificio Liceo de Betanzos (praza de Galicia 2, Betanzos, A Coruña).

Esta noite o noso socio Miki (Miguel Castro) participa nunha actuación en que fará pintura dixital en vivo acompañado dos DJ Carycar e do violinista Héctor Varela. Será en La Goleta Bar (rúa Luis Taboada 29, 36201 Vigo) a partir das 23:30 h. O cadro pintado será sorteado entre o público, e a entrada é gratuíta.

O suplemento «Smoda» do diario El País publicou este domingo unha entrevista coa nosa socia Emma Ríos.

Baixo o título «Marvel paga bien, pero no es tu obra», a breve conversa xira en torno ao salto de Emma desde as franquías de Marvel á súa obra propia Pretty Deadly, con guións de Kelly Sue DeConnick.

Despois da primeira experiencia en novembro, o Colectivo Miñoco —do que forman parte algúns dos nosos socios— organiza un novo Drink and Draw, unha reunión informal e lúdica para o debuxo.

Nesta ocasión será no café O Alfaiate (rúa de San Xoán 7, 15001 A Coruña) o xoves 26, a partir das 19:30 h, e novamente estará aberto a toda persoa interesada en participar.

«La ilustración gallega sale al extranjero para vivir del oficio» é o título do artigo que aparece hoxe no diario La Voz de Galicia, a contar a experiencia de varios ilustradores galegos que ven publicados os seus traballos alén das nosas fronteiras. Así, falan nel, acerca de axencias, editoriais e proxectos, Miguelanxo Prado e os nosos socios Patricia Castelao, David Rubín, Emma Ríos e Óscar Villán.

A nosa socia Minia Regos inaugura mañá, venres 20 de decembro, unha exposición de orixinais do seu último álbum ilustrado, Tac, tac, tac, plof. O libro, con textos de Pepe Monteserín, está publicado por Narval Editores.

O acto de inauguración será ás 20:00 h, na Librería Aenea (rúa dos Irmáns Rey-Alvite 3 baixo, 15702 Santiago de Compostela). A mostra poderá visitarse alí ata o día 11 de xaneiro.

Esta tarde preséntase ao público o libro A illa de todas as illas, escrito por Xabier P. DoCampo e ilustrado polo noso socio Xosé Cobas.

O acto contará coa participación dos autores e de Agustín Fernández Paz e o editor Manuel Bragado. Será ás 20:00 h, no local de Portas Ártabras (rúa da Sinagoga 22, 15001 A Coruña).

O noso socio David Pintor acaba de facer pública a aparición de catro modelos de cunca cerámica deseñados pola ceramista Verónica Moar e ilustrados por el. As pezas, en edición limitada, poderán ser adquiridas esta fin de semana no Mercado da Estrela, no CGAC (rúa Valle-Inclán 2, 15704 Santiago de Compostela), e posteriormente a través da web da ceramista, onde tamén poden verse diversas fotos destas.

David é ademais noticia polas súas últimas edicións —o libro de viaxe Lisboa, e a revisión do conto de Saint-Exupéry O estrambótico Principiño (con Carlos López, asinando a dúo como Pinto & Chinto)—, así como as súas ilustracións para o catálogo de xoguetes da firma italiana Città del Sole.

_{Foto: Verónica Moar}