A nosa socia Nuria Díaz ten xa dispoñible, nas súas tendas en liña en Etsy e Dawanda, o seu calendario 2014. O calendario ten unha ilustración por cada estación do ano (cada unha pode posteriormente ser enmarcada conmo lámina por separado), e hai versión en castelán e en inglés.
Por outra parte, Nuria deseñou as cubertas e interiores do novo CD do grupo Turbolaser, titulado Segundo asalto, e poden verse algunhas mostras no seu blog.
O Salón del Cómic de Getxo, que desenvolve a súa duodécima edición esta fin de semana, terá como unha das súas figuras máis destacadas ao noso socio David Rubín. Así, á parte de ser o autor do cartel deste ano, esta será a ocasión para a presentación en primicia da súa nova obra, a novela gráfica Beowulf, que asina co guionista Santiago García. O salón acollerá unha exposición de orixinais da obra, así como un coloquio con David o venres, 22 de novembro, ás 18:00 h, que estará conducido polo autor e crítico Borja Crespo. Además, David participará en varias sesións de sinaturas dos seus libros nos outros dous días do salón.
Por outra parte, Rubín anuncia desde o seu blog as seguintes dúas presentacións de Beowulf: o 28 de novembro na libraría Universal de Barcelona, e o 29, na libraría Alita Cómics da Coruña.
Este mércores, 20 de novembro, o noso socio Anxo Fariña presentará o libro Os Megatoxos e os Templarios da Luz no IES de Beade (Vigo). O centro celebra o seu 25.º aniversario cun completo calendario de actividades, entre elas a visita do autor e ilustrador da serie Os Megatoxos. Ademais da presentación, Anxo impartirá un obradoiro de ilustración para que mozos e mozas descubran os segredos que hai detrás dos debuxos da serie.
Mañá, venres 15 de novembro, inaugúrase na Libraría Biblos (rúa de Santiago 4, 15300 Betanzos, A Coruña) a exposición relativa á BD A Torre dos Mouros, creada polo noso socio Manel Cráneo como parte do proxecto arqueolóxico Torre dos Mouros para a divulgación das primeiras conclusións das investigacións desenvolvidas.
No acto de inauguración, ás 20:00 h, estarán presentes Manuel Gago, periodista e historiador, Antón Malde, arqueólogo (ambos os dous, asesores históricos desa BD) e o propio Manel Cráneo. Aproveitarase a ocasión para presentar tamén Vento e chuvia: mitoloxía da antiga Gallaecia, libro de relatos de Gago, ilustrado por Manel Cráneo.
Esta tarde, ás 20:00 h, José Domingo e mais Alberto Guitián estarán na libraría Alita Cómics (rúa do Orzán 94, 15003 A Coruña) a presentar os seus últimos traballos: por unha banda, o libro Conspiraciones, do primeiro, e por outra, os minicómics de José e Alberto incluídos dentro de Marrón, a nova caixa editada por Autsaider Comics. Neste caso, José Domingo e Alberto Guitián fixeron dúas historias interrelacionadas, tituladas respectivamente «Román» e «Ramón»; ambos contan máis sobre o proxecto nos seus blogs, aquí e aquí.
Hoxe chega ás librarías o volume El mundo de Lovely Pepa — Descubre el lado más personal de la bloguera de moda, da galega Alexandra Pereira Romero. A encargada de facer as ilustracións para as cubertas e as páxinas interiores, ademais de deseñar e maquetar o libro, é a nosa socia Paula Mayor.
El mundo de Lovely Pepa é un achegamento á visión persoal da autora dun dos blogs máis seguidos no mundo, gañadora do premio á blogueira máis influente na New York Fashion Week 2013.
Na ficha da editorial pode verse a portada con máis detalle, e algunhas das páxinas do libro.
O noso socio Martín Romero está a desenvolver o seu proxecto El manual de las Piedras, un webcómic de historias mudas que xa vai pola súa vixésimo quinta entrega, mentres no mercado francés a súa obra Les épisodes lunaires (publicada pola editora suíza Atrabile e aínda sen previsión de edición en España) está a ser moi ben recibida despois da súa aparición a finais de agosto.
Ademais, Martín abriu recentemente o seu traballo a outros campos, como o deseño de envases; así, realizou este saco de comida para cans para a marca galega Lolacool.
Esta mañá deuse a coñecer que Miguelanxo Prado foi galardoado co Premio Nacional do Cómic 2013, pola súa obra Ardalén. O xurado destacou «o carácter poético da súa obra, que mestura a realidade co soño, a memoria e o esquecemento, e a súa mestría técnica no uso da cor». O premio, concedido polo Ministerio de Educación, Cultura e Deporte, ten como obxecto distinguir a mellor obra desta especialidade publicada en calquera das linguas do Estado durante o ano anterior, e está dotado con 20 000 euros.
Miguelanxo Prado (A Coruña, 1956) ten publicado, entre outros, os álbums de banda deseñada Fragmentos de la Enciclopedia Délfica (1985), Stratos (1987) e Trazo de xiz (1990). En animación, deseñou os personaxes da serie Men in Black (1997), produciu a serie Os vixilantes do Camiño (2000), e produciu e dirixiu a longametraxe De Profundis (2007). É ademais director do salón do cómic Viñetas desde o Atlántico desde 1998, e membro da Real Academia Galega de Belas Artes desde 2009. É miembro da Comisión de Profesionais do Observatorio da Ilustración Gráfica.
O xurado estivo composto por Ulises Ponce, a proposta da AACE; Nacho Casanova, por FADIP; Rocío Orraca pola CEGAL; Laura Pérez Vernetti por Ficómic; Víctor Nieto pola Real Academia de Bellas Artes de San Fernando; Fátima Ruiz Bacaicoa pola FAPE; Isabel Tajahuerce polo Instituto de Investigaciones Feministas da Universidad Complutense de Madrid; Paco Camarasa polo Ministro de Educación, Cultura e Deporte, e mais os dous últimos autores galardoados, Santiago Valenzuela e Alfonso Zapico.
A revista dixital Numerocero.es publicou onte o artigo «La trastienda: Coloristas de cómic», asinado por David. G. Natal, no que se recollen declaracións de tres autores españois que traballan nesta especialidade no ámbito internacional: José Villarrubia, Javier Rodríguez e o noso socio Javi Montes. O artigo busca reflectir a visión dos profesionais «desta disciplina indispensable» para o mundo da banda deseñada. Javi Montes, pola súa parte, publicou no seu blog o contido completo da entrevista que lle fixeron, para complementar o publicado no artigo.
Nomeado socio de honra da AGPI o pasado sábado, Suso Cubeiro non só é un dos veteranos da ilustración en Galicia, senón que ten unha traxectoria multidisciplinar como poucos. Todo iso queda reflectido na entrevista realizada por Fernando Esclusa con ocasión da homenaxe, que agora reproducimos no Taboleiro da AGPI. O texto completo pode lerse aquí.
Na foto, a figura que lle foi entregada a Suso no transcurso do acto no Encontro Galego de Ilustración. Inspirada no logotipo da AGPI, está realizada por Laura Blanco.
