Autor: admin

A Associació Professional d’Il·lustradors de Catalunya (APIC) vén de publicar Manual de la internacionalització, un documento que ofrece ferramentas e recursos para poder xestionar mellor a busca e o desenvolvemento de proxectos no estranxeiro, e que pode ser descargado gratuitamente desde a súa web, nesta ligazón (PDF, 170 Kb).

O manual, redactado en catalán, inclúe información sobre as novas tecnoloxías, as redes profesionais e sociais, os axentes, as feiras (e recomendacións en concreto para as de Boloña e Montreuil), os concursos internacionais, as axudas de organismos e, finalmente, os contratos e a lexislación xurídica e fiscal que hai que ter en conta nestes casos.

A banda galega de rap Dios Ke Te Crew acaba de publicar o seu segundo disco, Humanose. Á parte de contar con colaboracións especiais no capítulo musical, no que se refire á presentación gráfica do cedé as ilustracións que inclúe son obra dos artistas urbanos Liqen e Sekone, socio da AGPI.

A décimo cuarta edición do festival de banda deseñada Viñetas desde o Atlántico, que decorrerá na cidade da Coruña entre o 8 e o 14 de agosto, ten xa pechadas as grandes liñas do seu programa. Cun cartel realizado por Camille Jourdy —convidada ao festival o pasado ano— , o Viñetas contará coa presenza e as exposicións dos autores Jordi Lafebre, Juanjo Guarnido, Juan Díaz Canales, Kim, Antonio Altarriba, Pere Joan e o noso socio David Rubín.

Ademais, haberá mostras retrospectivas sobre Os Pitufos e sobre os piratas na banda deseñada (comisariadas ambas por Toni Guiral), sobre superheroes (coordinada por Jaume Vaquer) e outra de orixinais da BD Valentina, de Guido Crepax (coa presenza da viúva e do fillo do autor italiano).

Como vén sendo habitual nas edicións do Viñetas desde o Atlántico, a AGPI contará cun posto propio dentro da zona comercial do festival, a chamada «Rúa da BD».

Dentro das actividades relacionadas coa exposición Acción #1 Polaqia, Nin9 e Sr. X —que continúa ata finais deste mes—, desenvolverase unha mesa redonda sobre a traxectoria do colectivo Polaqia. Será o vindeiro xoves, 7 de xullo, ás 20:00 h, no propio Espazo Normal da Universidade da Coruña (Paseo de Ronda 47, 15011 A Coruña).

Na mesa redonda intervirán Bernal Prieto (un dos fundadores de Polaqia), Brais Rodríguez (membro veterano) e José Domingo (en representación das últimas fornadas incorporadas ao colectivo); desta forma, as tres visións darán «unha panorámica o máis completa posible do que foron estes dez anos de actividade de Polaqia». Moderará o coloquio Henrique Torreiro, promotor e divulgador da BD, coordinador durante vinte anos das Xornadas de Banda Deseñada de Ourense.

O socio de AGPI Alberto Guitián infórmanos que o próximo venres 24 de xuño estará asinando exemplares do seu libro El Circo Lorza. O acto terá lugar ás 18 h na librería Komic (Rúa San Pedro de Mezonzo 38, 15701 Santiago de Compostela).

Guitián tamén asinará exemplares do seu álbum Petaco.

David Pintor inaugurou onte a exposición das ilustracións do seu libro Ciudades de papel na cidade alemá de Ratisbona, no marco do Festival Hispánico de Cine e Cultura (CinEsCultura). Composta por unha vintena de ilustracións que recrean as paisaxes urbanas de diferentes cidades, a mostra estivo anteriormente en Boloña, Tokío e Clermont-Ferrand (Francia).

Precisamente, o libro Cidades de papel foi galardoado en 2009 co Premio ao mellor caderno de viaxes da Biennale du Carnet de Voyage de Clermont-Ferrand —o más prestixioso festival na especialidade en Europa—, cuxo cartel oficial deste ano tamén é obra de David.

Mañá, mércores 22 de xuño, ás 19:00 h, inaugurarase a exposición de ilustracións Destapando bañeras, do colectivo Estómagos Vacíos, Cerebros Hambrientos, conformado por autores procedentes da Escola de Arte Pablo Picasso da Coruña, algúns deles membros da AGPI.

A temática xira en torno á comunidade LGTB (Lesbianas, Gais, Transexuais e Bisexuais) e enfócase como un exercicio de empatía por parte dos autores e dos espectadores. Os ilustradores participantes na mostra son Yago García, Jorge Fernández, Sara Carmona, Cristina Castro, Laura Crego, Pablo Suárez, Elena Valverde, Sole Rei, Marta G. Cabrillas, Brei, La chica de la cinta, Noel, Carlos Mauriz, Diego Pena, María Álvarez e Óscar Parada.

A inauguración da mostra contará cun aperitivo para o público asistente. Será no Centro Cívico Municipal de Monelos (Avda. de Monelos 2, 15008 A Coruña), onde permanecerá ata o día 30 de xuño. Despois, a exposición moverase por outros locais da Coruña e doutras cidades galegas.

Entre o 20 de xuño e o 29 de xullo, o Espazo Normal, centro de actividades culturais da Universidade da Coruña, acollerá a exposición Acción #1 Polaqia, Nin9 e Sr. X; nela xúntanse traballos de banda deseñada e de arte urbana. Os membros do colectivo Polaqia mostrarán debuxos e páxinas de banda deseñada, un mural, vinilos e unha peza audiovisual; son traballos de Brais Rodríguez, Bernal Prieto, Hugo Covelo, Emma Ríos, David Rubín, Sergio Covelo, José Domingo, Roque Romero, Diego Blanco, Álvaro López e Luis Sendón, ademais de achegas de Kike Benlloch, un dos membros fundadores do colectivo. Canda eles, Nin9 e Sr. X realizarán dous murais individuais e outros dous conxuntos neste espazo.

A exposición contará con actividades paralelas nas que se debaterá sobre BD e arte urbana, e servirá como anuncio e primeiro acto da despedida do colectivo, nacido hai xa dez anos. As actividades que Polaqia desenvolverá como fin da súa traxectoria acabarán co derradeiro día de 2011. No catálogo da exposición argumentan como explicación deste final o feito de teren conseguido sobradamente os obxectivos iniciais do proxecto, que entenden que debe dar paso a outros.

O noso socio Dani Montero será un dos convidados no Festival de Cómic de Múnic (Alemaña), co gallo da publicación da súa obra Sen mirar atrás traducida ao alemán por Edition 52 —a mesma editora para o mercado xermano de autores como Joe Matt, Baru, Seth ou Mattotti— co título de Kein Blick Zurük. Para o lanzamento internacional preparouse un novo booktrailer animado.

O álbum será presentado dentro da programación oficial do festival no Instituto Cervantes o día 18 de xuño ás 12:00 h. No mesmo lugar haberá tamén unha completa mostra dos seus orixinais. Ademais, entre os días 23 e 26, o autor asinará exemplares no festival en sesións de dúas horas cada tarde.

A vixésimo sexta edición do Premio Merlín de Literatura Infantil, organizado anualmente por Edicións Xerais canda o seu Premio Xerais de Novela, tivo como gañador o noso socio Anxo Fariña, coa súa obra A chave da Atlántida. O xurado estivo formado polo ilustrador Rodrigo Chao Blanco, a mestra de Primaria e bibliotecaria Julia González González, o escritor Antonio Reigosa, a bibliotecaria Ángeles Roca López, a profesora de Secundaria e blogueira Gracia Santorum López e mais Helena Pérez Fernández, que actuou como secretaria. O galardón está dotado con 10.000 euros.

O propio Anxo Fariña é tamén noticia porque a partir do 15 de xuño terá nas librarías a nova entrega da súa serie Os Megatoxos, cuxos anteriores libros venderon xa 30.000 exemplares. A cuarta aventura, que pasa a ser editada por Xerais, recibe o título de Os Megatoxos e a cara oculta de Lúa. Nela, o instituto dos Megatoxos cae en desgraza e unha horrible transformación esténdese polo alumnado e mais o profesorado. Entrementres, en Venecia, unha misteriosa raíña trata de dominar o mundo grazas ao poder do Toxo.