AGPI – Asociación Galega de Profesionais da Ilustración

Categoría: agpi

  • Reunións con institucións sobre a afectación da crise do COVID-19 no sector da ilustración e a cultura

    Reunións con institucións sobre a afectación da crise do COVID-19 no sector da ilustración e a cultura

    REUNIÓN DA FADIP CO MINISTERIO DE CULTURA E FACENDA

    Dende FADIP (Federación de Asociacións de Ilustradores/as Profesionais) seguimos a traballar. Despois de trasladarlle o Ministerio de Cultura a nosa precupación polas consecuencias da crise no sector, deseñamos 14 medidas concretas divididas en seis liñas de actuación. As catro primeiras están enfocadas a todo o sector da cultura, e as dúas últimas resolven problemáticas máis específicas do noso sector.

    • A primeira liña está enfocada ao sustento básico. 
    • A segunda propón axudas á profesionalización e asesoría. 
    • A terceira e cuarta detallan axudas ao investimento en cultura previa e posterior á crise para reactivar a nosa economía. 
    • A quinta enfocada ao sector da ilustración e as boas prácticas en dereitos de autoría.
    • A sexta á protección de traballadores e traballadoras culturais sen contrato en empresas que sofren  ertes.

    A reunión terá lugar esta tarde contorna ás seis. Asistirá o presidente da FADIP Daniel Crespo xunto aos e as máximas representantes dos Ministerios de Cultura e Deporte, e Facenda.

    REUNIÓN CA CONSELLERÍA DE CULTURA E TURISMO

    Ademais o pasado 6 de abril a AGPI tivo unha videoconferencia co conselleiro de Cultura e Turismo, Román Rodríguez, o director xeral de Políticas Culturais, Anxo Lorenzo e o secretario xeral de Política Lingüística, Valentín García. A reunión enfocouse nas consecuencias da crise do COVID-19 no sector do libro e tamén estiveron presentes a Asociación Galega de Editoras, a Asociación Galega de Escritoras e Escritores en Lingua Galega e a Federación de Librarías de Galicia. Tivemos a oportunidade de expoñer as problemáticas específicas do sector en relación o libro, medidas tamén recollidas no documento que desde FADIP se enviou o Ministerio de Cultura.

    Posteriormente solicitamos ao conselleiro de Cultura e Turismo unha nova cita onde poder reunirnos para falar unicamente das necesidades do sector da ilustración, a animación e o muralismo. Xa que a nosa profesión abrangue moitos campos de traballo e non unicamente o do libro. Xunto con esta petición adxuntamos un documento que recolle medidas concretas a desenvolver pola asociación en colaboración coa Xunta como: a creación dunhas bolsas de creación e a petición de axudas para o asesoramento legal. Estamos a espera da súa resposta.

    Ademáis de todas as medidas mencionadas, o pasado 20 de marzo apoiamos o BORRADOR PARA UN DOCUMENTO UNIFICADO DE PROPOSTAS DE ACCIÓN E DE MEDIDAS ESPECÍFICAS DIRIXIDAS AO SECTOR CULTURAL GALEGO POLAS CONSECUENCIAS DO COVID-19, que recolle medidas que consideramos importantes como a declaración da cultura como ben de primeira necesidade, ao igual que teñen feito Alemaña e Francia ou a redefinición da programación do Xacobeo 2021 para convertelo nunha ferramenta de reactivación e apoio aos sectores profesionais da cultura galega.

    Por último, queremos lembrarvos que a enquisa sobre o efecto económico da suspensión da actividade no sector da ilustración segue aberta ata o día 23 de abril, polo que vos animamos a participar se inda non o fixestes.

  • #ilustracionenlucha. Acción conxunta do sector da ilustración ante a COVID-19

    #ilustracionenlucha. Acción conxunta do sector da ilustración ante a COVID-19

    Dende FADIP (Federación de Asociacións de Ilustradores/as Profesionais) estamos a organizar unha acción conxunta co obxectivo de crear un informe interterritorial da situación do sector da ilustración no sentido máis amplo con respecto á crise xerada pola COVID-19.

    O eixo principal desta campaña son unha serie de enquisas que se están a realizar por diferentes asociacións de profesionais territoriais. A nivel galego, da nosa enquisa en particular, xa vimos falando dende fai uns días.

    Coa iniciativa anímase a tódalas persoas interesadas a descargar a imaxe da campaña e escribir un texto invitando a encher as enquisas. Podes compartila nas diferentes redes sociais xunto ó hashtag #ilustracionenlucha e etiquetando a @fadip_org.

    Máis información sobre a campaña na páxina de FADIP.

    Ilustración de Nuria Tamarit
  • Enquisa sobre o efecto económico da COVID-19 no sector

    Enquisa sobre o efecto económico da COVID-19 no sector

    Seguindo a estratexia doutras asociacións como APIC, desde a Asociación Galega de Profesionais da Ilustración vai desenvolverse un pequeno estudo sobre a situación económica dos ilustradores/as ante a parada de actividade provocada pola COVID-19. Este estudo servirá para analizar que medidas é importante tomar e solicitar ás diferentes administracións. A AGPI está en contacto activo con outras entidades e asociacións representativas do sector das industrias culturais, e coñecer de primeira man a experiencia dos profesionais da ilustración vai servir para trasladar as súas necesidades a documentos sectorais.

    Así pois, a AGPI convida a todos os ilustradores e ilustradoras interesados a participar, de forma totalmente anónima, nesta enquisa en liña.

  • Encontro de Ilustración no Salón de Pontevedra

    Encontro de Ilustración no Salón de Pontevedra

    Actualización (12/3/2020): o organización do Salón cancelou todas as actividades, seguindo as instrucións da Xunta de Galicia e o Ministerio de Sanidade, que recomendaban a suspensión de eventos masivos. O Encontro de ilustración queda, pois, tamén cancelado.

    O próximo venres 13 de marzo, dentro do programa do Salón do Libro Infantil e Xuvenil de Pontevedra, terá lugar ás 17:30 un Encontro profesional de ilustración, no Pazo da Cultura de Pontevedra (rúa Alexandre Bóveda, s/n, 36005 Pontevedra). A actividade está organizada pola AGPI en colaboración co Salón, e constará dunha charla e unha mesa redonda.

    A charla terá como título «O poder de asociarse»; nela explicarase o traballo que se realiza desde a asociación e cales son os motivos da súa existencia. A continuación, a mesa redonda «Un ilustrador na miña cidade. Crear comunidade» reunirá os Ilustradores pontevedreses Berto Fojo, Natalia Umpiérrez e Diego Estebo, moderados por Bea Lema. Falarán de como entenden o asociacionismo e de como é traballar desde Galicia nun mundo global.

    A asistencia ao encontro é gratuíta, mais é preciso inscribirse escribindo ao enderezo ponteilustra@gmail.com.

  • Comezan as sesións do Clube de Debuxo en Vigo con wáter-polo

    Comezan as sesións do Clube de Debuxo en Vigo con wáter-polo

    O Clube de Debuxo, organizado pola AGPI, que ata agora desenvolveu maioritariamente as súas sesións na cidade da Coruña, chega este mes de marzo a Vigo. Farao cunha sesión de debuxo durante un adestramento do equipo de wáter-polo do Real Club Náutico de Vigo. Será no propio Real Club Náutico (rúa das Avenidas, s/n, 36202 Vigo), o próximo venres 6 de marzo, de 21:30 a 22:30.

    Como nas anteriores ocasións, o Clube de Debuxo está dirixido a ilustradores, animadores, debuxantes de cómic e estudantes de ilustración. É unha actividade tanto para socios como para non socios da AGPI. As prazas, totalmente gratuítas, son limitadas e outórganse por rigorosa orde de inscrición, mediante o formulario electrónico http://bit.ly/32uwo3Q. O prazo de inscrición estará aberto ata o 5 de marzo.

    A sesión desenvolverase na piscina cuberta do Real Club Náutico de Vigo. A piscina dispón dunha zona de gradas onde acomodarse. Recoméndase ás persoas inscritas levar auga e roupa fresca, dado que na zona onde se realizará a sesión vai moita calor. A sesión comezará con puntualidade e só se poderá acceder ao recinto co grupo de inscritos.

    O Clube de Debuxo naceu coa intención de realizar unha práctica interesante rodeados de compañeiros, ademais de crear un punto de encontro entre profesionais onde compartir as nosas experiencias e inquedanzas. Anteriormente realizáronse sesións de debuxo nun ensaio da Sinfónica de Galicia, na piscina municipal do Club do Mar da Coruña, no Mercado de Verdura de Vilagarcía e nun ensaio de danza no Teatro Rosalía de Castro da Coruña, así como en varias ocasións cun modelo en vivo na Fundación Luís Seoane. A partir de agora, amplíase o número de lugares de realización do Clube, e unha das localidades habituais será Vigo.

    Ilustración de Martín Romero
  • Sesión do Clube de Debuxo da Coruña, con debuxo de modelo

    Sesión do Clube de Debuxo da Coruña, con debuxo de modelo

    A cita de febreiro do Clube de Debuxo, iniciativa da Asociación Galega de Profesionais da Ilustración, volve adoptar a forma de sesión de debuxo con modelo en vivo na Fundación Luis Seoane (rúa San Francisco, 27, 15001 A Coruña), este venres, 21 de febreiro, de 19:00 a 21:00. 

    Como vén sendo habitual, para permitir realizar un debuxo áxil, as poses do modelo serán curtas, de entre un e dez minutos, e o recomendable será moverse pola sala, aínda que haberá cadeiras para quen queira. 

    As actividades do Clube de Debuxo están dirixidas a ilustradores, animadores, debuxantes de cómic e estudantes de ilustración. No caso dos socios da AGPI, a actividade é gratuíta, pero aos non socios nesta ocasión pediráselles un donativo de 2 euros (na propia sala), para cubrir o pagamento do modelo. Cada asistente, como é habitual, debe levar o seu propio material de debuxo. Para realizar a inscrición, só hai que cubrir este formulario en liña. As prazas son limitadas, e serán adxudicadas por rigorosa orde de inscrición.

    Esta é a oitava sesión do Clube de Debuxo; anteriormente realizáronse outras na propia Fundación Luis Seoane, nun ensaio da Sinfónica de Galicia, na piscina municipal do Club do Mar da Coruña, no Mercado de Verdura de Vilagarcía e nun ensaio de danza no Teatro Rosalía de Castro da Coruña.

    O Clube de Debuxo naceu coa intención de realizar unha práctica interesante rodeados de compañeiros, ademais de crear un punto de encontro entre profesionais onde compartir as nosas experiencias e inquedanzas. A partir de agora, as sesións do Clube comezarán a realizarse tamén noutras localidades galegas, que se anunciarán en breve.

  • Vídeo homenaxe a Cándido Fernández Mazas

    Vídeo homenaxe a Cándido Fernández Mazas

    Un dos obxectivos do Día da Ilustración é recuperar e dar a coñecer ao gran público figuras históricas da ilustración en Galicia. Este ano, o artista e escritor Cándido Fernández Mazas é o que merece esa homenaxe. Fernández Mazas (Ourense, 1902 – Castro Caldelas, 1942) colaborou como ilustrador en libros, revistas como Nós ou Alfar e xornais como La Zarpa, Galicia, El Pueblo Gallego ou Política. En París tomou contacto coas vangardas artísticas, e durante a Segunda República participou nas actividades culturais das «Misións pedagóxicas» realizando carteis e decorados para o seu teatro de monicreques. Ao final da Guerra Civil foi encarcerado, o que afectou seriamente a súa saúde, e morreu sen chegar a cumprir os corenta anos. Despois de moitos anos de esquecemento, afortunadamente a súa obra foi reivindicada a finais dos anos oitenta.

    Como cada ano, entre outras actividades, a AGPI produce, en colaboración coa Dirección Xeral de Políticas Culturais da Xunta de Galicia, un vídeo que repasa nun par de minutos a vida e a obra do autor homenaxeado.

    Como nas edicións anteriores (Álvaro Cebreiro en 2017, Camilo Díaz Baliño en 2018 e Federico Ribas Montenegro en 2019), o guión corre a cargo de Alberto Guitián, e a música vén da man de Roberto Casteleiro, que nesta ocasión versiona un tema de Erik Satie —un dos músicos favoritos de Fernández Mazas—. A animación e montaxe do vídeo é responsabilidade este ano de Martín Romero, coa colaboración de Isabel Vila.

    Toda a información sobre Fernández Mazas e o resto das actividades relacionadas con el e co Día da Ilustración, nesta ligazón.

  • Día da Ilustración 2020

    Día da Ilustración 2020

    O Día da Ilustración celébrase en Galicia cada ano o 30 de xaneiro, coincidindo co día do nacemento de Castelao. Ademais de lembrar e reivindicar o papel dos profesionais da ilustración na industria cultural, cada ano é homenaxeado un ilustrador histórico galego. O protagonista deste ano é Cándido Fernández Mazas.

    Cándido Fernández Mazas (Ourense, 1902 – Castro Caldelas, 1942) foi artista e escritor, e colaborou como ilustrador en publicacións como Nós ou Alfar. Ilustrou numerosos libros e asinou baixo distintos pseudónimos en xornais como La Zarpa, Galicia, El Pueblo Gallego ou Política. En 1925 obtivo unha bolsa para estudar arte en París, onde entrou en contacto coas vangardas. Durante a Segunda República, participou nas actividades culturais das «Misións pedagóxicas» realizando carteis e decorados para o seu teatro de monicreques. A súa saúde psíquica e física quedou seriamente afectada pola Guerra Civil; morreu sen chegar a cumprir os corenta anos.

    A Biblioteca de Galicia acollerá a exposición «Cándido Fernández Mazas: signos dunha quimera», con documentos, libros, imaxes e obras de Fernández Mazas que forman parte da colección da Biblioteca e Arquivo de Galicia. A mostra inagurarase o 30 de xaneiro ás 11:00, e poderá visitarse ata o 29 de maio na sala de exposicións da Biblioteca de Galicia, no Monte Gaiás. Nos próximos días presentarase o vídeo de homenaxe que produce a AGPI coa colaboración da Dirección Xeral de Políticas Culturais, e que tamén se proxectará na mostra.

    Ademais, no programa de actividades previsto para as bibliotecas públicas e escolas de arte galegas, hai unha mostra sobre o autor homenaxeado na bilioteca pública de Pontevedra, e o estudoso da súa obra José Manuel Bouzas dará unha charla na EASD Antonio Faílde de Ourense o 29 de xaneiro ás 12:00.

    Por parte da AGPI (e co patrocinio da Consellería de Cultura e Turismo), están previstas actividades na EASD Pablo Picasso da Coruña os días 29 e 30 de xaneiro. O 29, a partir das 19:00 presentarase o Día da Ilustración e a continuación haberá unha charla co autor convidado Jesús Cisneros, que chega a Galicia despois de impartir talleres en lugares como Marsella, Seúl ou Bangkok. O 30, para as persoas previamente inscritas (as prazas están xa esgotadas), Cisneros impartirá un obradoiro de máscaras no mesmo lugar.

    No resto de bibliotecas públicas haberá diferentes mostras, obradoiros e charlas con ilustradores como María Lires, Jorge Campos, Laura Núñez, Pablo Otero ou Xulia Pisón, que é ademais a autora do cartel do Día da Ilustración deste ano. Pola súa parte, o Club de Prensa de Ferrol tamén se sumou este ano á celebración cun acto de homenaxe a Fernández Mazas na Biblioteca Municipal ferrolá.

    O Día da Ilustración é unha iniciativa da Consellería de Cultura e Turismo da Xunta de Galicia en colaboración coa Asociación Galega de Profesionais da Ilustración (AGPI).

    Cartel do Día da Ilustración 2020, obra de Xulia Pisón
  • Taller con Jesús Cisneros no Día da Ilustración

    Taller con Jesús Cisneros no Día da Ilustración

    Coincidindo coa celebración do Día da Ilustración 2020 —da que en breve daremos máis información—, a AGPI terá un convidado de luxo, grazas ao patrocinio da Consellería de Cultura e Turismo. O ilustrador Jesús Cisneros estará os días 29 e 30 na Escola de Artes Pablo Picasso da Coruña: o mércores día 29 dará unha charla sobre a súa obra, con entrada libre e gratuíta; o xoves 30, impartirá un Taller de máscaras, tamén gratuíto, pero para o que é necesaria inscrición. En ambos os casos, trátase dunha oportunidade única de ver e escoitar este artista.

    O taller, que decorrerá entre as 16:00 e as 20:00, precisa de inscrición mediante este formulario. As prazas son limitadas e serán otorgadas por orde de inscrición. Os asistentes deberán traer o seu propio material: tinta chinesa, pinceis (fino, medio, groso), pintura vermella (gouache ou acrílico); papel A4, de 100 g (30 follas por alumno).

    Jesús Cisneros naceu en Zaragoza en 1969. Formouse na súa cidade natal e estudou ilustración na escola de artes, e historia da arte na universidade. A súa obra caracterízase pola economía de elementos, os trazos sinxelos de carácter practicamente minimalista e unha breve selección de cores para dar vida a ilustracións moi evocadoras. A sensibilidade e a técnica mestúranse nas ilustracións de Cisneros, demostrando que poden contarse grandes historias con moi pouco.

  • Sumámonos a campaña «Ilustradores en branco»

    Sumámonos a campaña «Ilustradores en branco»

    Os nosos compañeiros da APIM (Asociación de Profesionales de la Ilustración de Madrid) puxeron en marcha durante a Feira do Libro do pasado mes de abril a campaña «Ilustradores en blanco», que ten como obxectivo principal denunciar a precariedade do mercado editorial. Pode lerse o manifesto aquí, e tamén poden verse imaxes das accións realizadas na súa conta de Instagram. 

    Desde a AGPI cremos que é importante unir forzas nesta dirección e sumámonos á campaña. Así pois, estamos a organizar unha queda, coordinada coas outras asociacións de ilustradores, este sábado 21 en librarías do centro de distintas cidades. Serán benvidos todos os ilustradores/as, así como todos os amantes e defensores da ilustración. Os asistentes, se é posible, levarán posto algo branco e repartirán marcapáxinas da campaña.

    De momento temos confirmadas as quedas en Santiago e A Coruña. Para quen non poida asistir, pode colaborarse de diversas formas:

    1. Descargando aquí o marcapáxinas de #ilustradoresenbranco e imprimindo algúns exemplares.
    2. Indo a librarías próximas, coñecidas, explicando a campaña, e pregúntadolles se se poden deixar marcapáxinas ao dispor dos clientes ou dentro dalgúns libros.
    3. Facendo seguimento do que se está a facer e subíndoo a redes (unha foto co libreiro ou libreira que acepta colaborar na campaña, unha foto poñendo os marcapáxinas etcétera).
    4. Póndolle os cancelos #ilustradoresenblanco e #ilustradoresenbranco a ao que se suba ás redes, etiquetándonos.

    En breve confirmaremos as datas e lugares das quedas.