Categoría: historico

O programa de TVE Desde Galicia para el mundo dedicou unha ampla reportaxe, de case media hora de duración, á banda deseñada galega, desde as súas orixes ata a actualidade. Entre outras moitas cuestións, como entrevistas á investigadora Charo Crespo, a Miguelanxo Prado ou a Kiko da Silva, houbo espazo para falar do labor da AGPI, da man do seu presidente Santy Gutiérrez, e dos últimos traballos de socios como Manel Cráneo, Emma Ríos ou David Rubín.

Pode accederse aos vídeos desde a web do programa, ou ben a través destes links: 1 2 3 4.

Varios socios da AGPI participan na Exposición-Homenaxe a Blanco Amor que pode visitarse no Museo do Humor de Fene (Casa da
Cultura, avenida de Conces 20-22, 15500 Fene) ata o próximo 23 de novembro. A mostra está comisariada por Siro López, e encádrase nos actos
organizados polo Concello de Fene pola convocatoria da 30.ª edición do Premio de Novela Longa Eduardo Blanco Amor.

Na exposición exhíbese obra gráfica inspirada na obra e na vida do escritor ourensán, a cargo de Aida Alonso, Almudena Aparicio, Augusto Metztli, Calros Silvar, Dani Padrón, Gonzalo Vilas, Idoia de Luxán, Jaime Asensi, Michel Casado, Miki, Nachortas, Pablo Otero, Pinto e Chinto, Santy Gutiérrez, Siro López, Xan Carpente, Xosé Cobas e Xosé Lois (Carrabouxo).

Nesta galería poden verse as obras expostas.

Como avanzabamos aquí hai unhas semanas, o noso socio Mariano Casas promoveu na web de crowdfunding Verkami o proxecto de edición da súa banda deseñada El Club del Miedo. Hai uns minutos acabou o prazo para facer achegas económicas, e fíxoo con éxito, xa que superou a cantidade prevista para a súa realización. Así pois, a edición poderá levarse adiante.

E continúa, aínda cun mes de prazo restante, outra iniciativa parecida, a de Idoia de Luxán, que promove na mesma web a edición da súa BD Alleos.

Casa K, a marca con que a editora Kalandraka comeza a comercializar pezas de roupa inspiradas en personaxes dos seus contos, inicia a súa andaina con ilustracións dos libros O coelliño branco e A cebra Camila, en ambos os dous casos da autoría do noso socio Óscar Villán.

Nesta primeira etapa de Casa K, póñense á venda camisetas e pixamas de algodón para nenos e nenas de entre 2 e 6 anos.

Esta fin de semana aparecía no dixital Praza Pública unha entrevista co noso socio Manel Cráneo. Nela fálase da última obra de Manel, Cousas de mortos, e mais da súa faceta como editor, ao mando de Demo Editorial. A entrevista completa pode lerse aquí.

Está xa dispoñible o calendario que o noso socio David Pintor preparou para o ano 2013. As súas ilustracións están dedicadas á literatura universal; aparecen, así, escritores como Sartre, Clarice Lispector, Cela ou Cervantes. A publicación corre a cargo de Bululú, editora relacionada coa coruñesa libraría Cascanueces.

Na web desta última podemos encontrar o vídeo time-lapse da realización do mural que decora exteriormente a libraría, obra tamén de David Pintor.

A nosa socia Idoia de Luxán lanzou esta semana, na web de crowdfunding Verkami, o seu proxecto de banda deseñada Alleos. As persoas interesadas en mercar un exemplar ou axudar de forma máis ampla neste proxecto poden facer achegas económicas durante corenta días; esas achegas só se farán efectivas en caso de que se consiga o financiamento previsto nese prazo.

Toda a información sobre este cómic e a forma de apoiar a súa edición pode encontrarse aquí.

Mentres tanto, o proxecto de Mariano Casas na mesma web, El Club del Miedo —do que se deu noticia anteriormente—, está xa na súa derradeira semana, moi próximo a conseguir o seu obxectivo.

O noso socio José Domingo impartirá no espazo Polisemias (rúa da Nosa Señora do Rosario 5, 15001 A Coruña), especializado en talleres literarios, o curso ¡Catacrok! O curso está definido como unha «inmersión na narrativa da BD e a súa metodoloxía de creación,
abranguendo tanto os aspectos teóricos como os prácticos da creación
de obras de narrativa gráfica, desde as primeiras fases de guión e
planificación ata a autopublicación dun fanzine cos trabajos
do taller».

O curso decorrerá os luns entre o 5 de novembro e o 17 de decembro (de 18:00 a 20:00 h). Máis detalles sobre prezos de inscrición, aquí.

José Domingo publicou recentemente no Reino Unido, da man da prestixiosa editorial Nobrow, o seu último traballo, titulado en inglés Adventures of a Japanese Business Man.

Cunha afluencia de máis de 80 persoas, as actividades abertas ao público da novena edición do Encontro Galego de Ilustración foron consideradas un éxito por parte da organización. Ao longo das catro charlas da mañá, repasáronse os distintos tipos de animación, desde a óptica das pequenas e das grandes producións, coa presenza de relatores de primeira liña.

Na fotografía pode verse a maioría dos asistentes, no tradicional «Fotomatón» realizado por Óscar Villán. Nesta ligazón pode verse noutros tamaños, ademais doutras fotografías da xornada, da autoría de Pinturero.

A editorial Xerais porá á venda nos próximos días dúas novas bandas deseñadas realizadas por socios da AGPI. Por unha parte, aparece a anunciada novela gráfica Cartas de inverno, adaptación de Antonio Seijas da obra de Agustín Fernández Paz.

Ao mesmo tempo, chega tamén o primeiro volume da serie Marcopola: A illa remeira, de Jacobo Fernández Serrano, versión en galego da editada previamente por Mamut/Bang en castelán, catalán e francés. Este título inicia en Xerais unha colección dedicada á BD, chamada «Merlín comic», dirixida aos primeiros lectores