Categoría: historico

Nota: Santy Gutiérrez
Ilustración: Manuel Lariño

O 3 de xaneiro de 2006 cumprirase o primeiro aniversartio da morte do gran mestre de debuxantes William Erwin Eisner, que faleceu á idade de 87 anos por unha insuficiencia cardíaca.

A obra deste autor é inmensa, cuantitativa e cualitativamente, e serviu de escola a xeracións de profesionais do debuxo. Pero non só o resultado do seu traballo é admirable, senón tamén o modo en que logrou exercelo: dende que os seus primeiros traballos profesionais fosen publicados á idade de 19 anos na revista WOW, What a Magazine!, ata a súa última obra, a novela gráfica publicada no ano 2003, Fagin the Jew (Fagín o xudeu), transcorreron nada menos que 67 anos. 67 anos de vida profesional, que nin sequera a II guerra mundial logrou interromper cando Will Eisner foi chamado a filas, pois en pleno conflito seguiu debuxando carteis e historietas para entreter aos seus compañeiros de filas. Todo un exemplo de tesón, dedicación e amor ao medio que quen intentamos dedicarnos a este difícil oficio deberiamos imitar.

Na AGPI quixemos render homenaxe a unha vida adicada á historieta, debuxando versións persoais do seu personaxe máis coñecido: The Spirit. Aquí podes ver os traballos dos socios: Homenaxe a Eisner.

Grazas Will.

Esta exposición pretende mostrar o proceso de elaboración tanto dun cómic como de ilustracións, baseándose na versión en cómic de Jaime Asensi do Ubu rey de Alfred Jarry, e outras ilustracións e orixinais non publicados. Terá lugar no Pazo da Peregrina de Bertamiráns (Ames, A Coruña), do 14 ao 26 de novembro, en horario de 18h a 21h (luns a venres) e de 12h a 14h e de 17h a 20h (sábados e domingos). A inauguración (con pinchos) farase o día 14 ás 20h. Os interesados en coñecer máis detalles sobre este evento poden poñerse en contacto co Concello de Ames ou directamente con Jaime Asensi.

O próximo sábado 29 de outubro terá lugar en Santiago de Compostela o II Encontro de Ilustradores Galegos. O Encontro contará nesta ocasión coa presencia dos ilustradores Arnal Ballester e Raúl, que impartirán sendas conferencias pola mañá, na Fundación Caixa Galicia de Santiago (rúa do Vilar 19). O acceso a estas conferencias é libre; pode asistir calquera persoa interesada no tema.

Ó remate das conferencias os socios de AGPI celebraremos a comida anual de confraternización no restaurante O Dezaséis (rúa de San Pedro nº 16). Pola tarde, de novo na Fundación Caixa Galicia, faremos a tamén anual asemblea xeral.

O horario da xornada será o seguinte:

• 10.00 a 11.00h: Recepción, saúdos e entrega do material.
• 10.30h: Roda de prensa.
• 11.00 a 11.15h: Presentación. Manel Cráneo.
• 11.15 a 12.30h: Maquillando muertos. Conferencia de Arnal Ballester.
• 12.30 a 12.45h: Descanso.
• 12.45 a 14.15h: Raúl falará da súa experiencia como ilustrador de prensa.
• 14.45h: Comida de confraternización no restaurante O Dezaseis
• 17.30 a 20.00h aprox.: Asamblea xeral.

Comentamos tamén, por se é do voso interese, que precisamente o día anterior ó Encontro a Fundación Caixa Galicia inaugurará unha exposición sobre Frida Kahlo no mesmo edificio no que terán lugar as conferencias.

Arnal Ballester (Barcelona, 1955), ilustrador, profesor na Escola Massana D’Art i Disseny de Barcelona e membro da Asociació Professional d’Il.lustradors de Catalunya (APIC). En 1993 recibiu o Premio Nacional de Ilustración por La boca risueña (Ed. Destino, 1992). Nese mesmo ano recibiu tambén o premio UNICEF-Illustrator of the Year de la Fiera dei Livri per Ragazzi di Bologna, e o Premio da Crítica Serra d’Or en 1995 pola colección Els artistics casos d’en Fricandó (Ed. Destino, 1992-1995). Colabora habitualmente co xornal El Mundo e o fixo durante anos con El País.

Algúns dos seus libros: No tinc paraules (Ed. Media Vaca, 1998), Vista cansada (recopilación de debuxos feitos mentres falaba por teléfono, Ed. Sinse Ntido, 2000), Base y el generador misterioso (texto de J. A. Millán, Ed. Círulo de Lectores, 2002), Chamario (texto de E. Montejo, Ed. Ekaré, 2004).

Raúl (Raúl Fernández Calleja, Madrid, 1960) é, entre outras cousas, ilustrador de prensa, revistas e libros para nenos, debuxante e guionista de cómic, e escultor. Os seus primeiros traballos apareceron nas revistas El Cairo y Madriz. Entre os anos 1986-1998 ilustrou diariamente a sección de opinión de El País (xornal que en 1990 o enviou a Rusia como corresponsal gráfico). Colaborou en revistas como Marie-Claire, Attonitus, Cinemanía, etc. Publica actualmente nos xornais La Razón e La Vanguardia.

Algúns dos seus libros: Berlín 1931 (Texto de F. H. Cava, Ed. Casset, 1991), Raúl, fe de erratas (Textos de Raúl e F. H. Cava, Ed. Casset, 1992), Raúl, cuaderno perplejo (recopilación de ilustraciones para El País, Ed. Casset, 1992), Ventanas a Occidente (Texto de F. H. Cava, Luca Ed., 1994), Angulo el malo (obra de teatro, Camarasa y Mac Diego Editores, 1998), Pertinencias (caricaturas, Ed. Pataphysícas de la Candelaria, 2005).

Agradecemos a colaboración do Departamento de Mocidade e Xuventude do Concello de Santiago de Compostela e da Fundación Caixa Galicia.

Desde mediados do pasado mes de setembro, cada socio da AGPI pode dar de alta, actualizar ou facer calquera modificación por si mesmo na súa sección da galería web da asociación. Esto é posible gracias a aplicación que deseñaron o noso socio Xan Carpente e o seu compañeiro José Manuel Domínguez, ambos membros da empresa Xolda Diseño S.L.L. Convidámoste a que actualices a túa sección na web con novos traballos, ou que a des de alta, se aínda non o fixeras. O procedimento é moi sinxelo, podes ler as instruccións na zona socios da propia web.

Por outra banda, acabamos de renovar a portada da web, misturando o índice de enlaces que había aquí co noticiario ou taboleiro de anuncios que ata agora estaba en agpi.blogspot.com. Que a páxina sexa a partires de agora máis ou menos dinámica depende de nós mesmos e das noticias, anuncios, opinións, etc. que enviemos. Convidamoste a que remitas a webmaster arroba agpilustracion.org calquera información relacionada co mundo do debuxo, ilustración, cómic, para que sexa publicada. Que non vos bote para atrás o ter que redacta-las posibles notas que enviedes á páxina: é un taboleiro de noticias, a maior parte das veces chegará cun par de liñas.

A parte desto, mantéñense, como xa sabedes, as seccións de sempre: actas de reunións pasadas, estatutos, instruccións de participación na lista de correo, boletíns de outras asociacións do estado, informacións legais varias, etc.