Autor: admin

Mañá, sábado 12, na Casa das Insuas (rúa José Pardo y Pardo Montenegro 27, 27370 Rábade, Lugo), o noso socio Calros Silvar impartirá un obradoiro de bosquexos de campo. Trátase dun curso intensivo de iniciación á realización de apuntamentos do natural dirixido a biólogos, naturalistas, monitores de tempo libre e afeccionados á natureza en xeral, e terá unha duración de 6 horas (de 10:30 a 13:30 e de 15:30 a 18:30). O custo é de 6 euros para socios da AGCT, e de 10 euros para os non socios. Para obter máis información e inscribirse, pode acudirse á web da Casa das Insuas.

Aínda que xa hai un tempo que os nosos socios Santy Gutiérrez e David Rubín deseñaron a decoración mural de dous andares das oficinas da empresa de telecomunicacións R, o número de xaneiro da revista periódica que a compañía edita para os seus clientes dedica unha reportaxe a esas ilustracións, con pequenas declaracións dos dous autores sobre o reto que supuxo a súa realización. A reportaxe pode lerse na versión en PDF da revista (páxinas 8 e 9; descárgase aquí); algunhas imaxes máis sobre o mural de Santy Gutiérrez poden verse aquí.

Ata o próximo 20 de xaneiro estarán expostos na Biblioteca Ánxel Casal (avenida de Xoán XXIII s/n, 15704 Santiago de Compostela) os debuxos realizados na 37.ª SketchCrawl, desenvolvida en Santiago de Compostela o pasado mes de outubro. Entre os 17 artistas que mostran as súas obras está o noso socio Mariano Casas.

Mariano, ademais, presenta o seu cómic El Club del Miedo este venres día 11, ás 20:00 h, no taller creativo No Importa (rúa de Santo Andrés 46, 15003 A Coruña).

O volume O libro dos Reis Magos, publicado pola Xunta de Galicia, inclúe textos de vinte e seis escritoras galegas e ilustrado pola nosa socia Marina Seoane. O libro será distribuído gratuitamente a través dos concellos que forman a Rede de Dinamización Lingüística, en coincidencia coa celebración das cabalgatas de Reis de toda Galicia. Ademais, pode descargarse en PDF desde esta ligazón.

Non é o único traballo de Marina relacionado con estas datas en Galicia, xa que tamén é da súa autoría o cartel do «Poboado lapón» que instalou este Nadal Concello da Coruña na praza de María Pita.

O noso socio David Pintor, como membro do tándem Pinto & Chinto, acaba de publicar o libro As estrambóticas viaxes de Gulliver, revisión humorística do clásico de Jonathan Swift.

Por outro lado, este mes de decembro tamén presentou o volume O Grande Chefe, publicado pola editora portuguesa Tcharan, no que ilustra textos de Carlos Nogueira.

O noso socio Miki (Miguel Ríos López) clausura este serán, ás 20:00 h, a súa exposición Carne de papel, que estivo nas últimas semanas no bar A Tapa das Meigas (rúa dos Olmos, 15003 A Coruña). Será cunha «Fiesta de descuelgue y del fin del mundo», que continuará ás 22:00 h no restaurante Café da Guiné (rúa de San Xosé 2, 15002 A Coruña) coa inauguración dunha nova exposición titulada Prêt-à-porter, e haberá para a ocasión un «recital poético apocalíptico».

La Llave de Poder, primeiro
libro da saga de novelas de fantasía Trisquelium, será presentado hoxe na Librería
Arenas (rúa do Cantón Pequeno 25, 15003 A Coruña), ás 20:30 h.

Acompañando o autor, Saulo R. Mars, estarán tamén o noso socio
Pinturero (autor das ilustracións do libro) e mais o xornalista Pablo Portabales.

Mañá, venres 21 de decembro, coincidindo coa data indicada como fin do mundo polo calendario maia, Demo Editorial organiza a presentación do libro Cousas de mortos, de Manel Cráneo. No mesmo acto, o autor asinará exemplares desta obra, así como da nova edición d’Os Lobos
de Moeche —que xa leva vendidos 3000 exemplares, e que nesta ocasión se vende conxuntamente co comicbook A Torre dos Mouros, tamén de ambientación medieval—.

Será ás 19:30 h na libraría Alita Comics (rúa do Orzán 94, 15003 A Coruña). Todos os compradores serán convidados a canas de cervexa e participarán no sorteo dunha lámina enmarcada e asinada.

Ao terminar, a festa continuará no Pub Dublín (rúa das Panadeiras 50, 15001 A Coruña), onde permanece a exposición de pranchas da BD A Torre dos Mouros, e ademais haberá música en directo.

Mañá, mércores 19 de decembro, o noso socio Mariano Casas presentará o seu libro El Club del Miedo. No acto, falará sobre o proceso creativo deste cómic, as súas influencias e a experiencia no financiamento mediante crowdfunding que empregou para a edición do libro.

Será ás 20:30 h, no Instituto Europeo Campus Stellae (rúa Concepción Arenal 1, 15702 Santiago de Compostela).

Mañá, 18 de decembro, preséntase o libro Paxaro de mar e vento, escrito por Tucho Calvo e ilustrado polo noso socio Xosé Cobas.

O acto será no salón de actos da Biblioteca Miguel González Garcés (rúa Miguel González Garcés 1, 15008 A Coruña), ás 20:00 h, e precederá a inauguración da exposición dos óleos realizados por Xosé Cobas para o libro, que poderá visitarse na biblioteca ata o 26 de xaneiro.