Autor: admin

Esta tarde será inaugurada a mostra Exhibición de enxendros artísticos no café Detrás do Marco (rúa Londres s/n, 36202 Vigo). A exposición inclúe debuxos e ilustracións de Jano, Macarena González Muñoz e mais o noso
socio Sergio Covelo.

O acto de inauguración, a partir das 20:00 h, contará coa actuación en directo da banda Santos Morcegos.

Entre hoxe e o día 22 de setembro desenvólvese na capital arxentina o primeiro Festival Internacional de Historieta Comicópolis, que contará como convidado co noso socio David Rubín, ao lado de autores como David B., Carlos Nine, Quino, Joost Swarte ou Bill Sienkiewicz. En concreto, David dará unha charla esta tarde entrevistado polos críticos Andrés Accorsi e Carlos Reyes, e durante o festival o público poderá visitar a súa exposición Furias y virtudes.

A axenda de David Rubín continúa ao seu regreso a España, pois participa o próximo martes 24 na Social Good Summit Madrid, de Intermon Oxfam, no debate «Un lenguaje para el cambio: el cómic», con Sonia Pulido, Miguel Gallardo, Cristina Durán & Miguel Ángel Giner Bou, Álvaro Ortiz e Paco Roca, moderados por Gerardo Vilches. Será no auditorio de Medialab Prado (plaza de las Letras, Alameda 15, 28014 Madrid), de 20:00 a 20:30 h. E desde o venres 27 participa na exposición colectiva Arts & Rock Crafts, sobre a cultura dos posters de concertos de rock, dentro do evento «El Garito de Converse», de Converse Get Loud.

Durante esta semana, a coincidir co festival Freakemazine da Coruña, o noso socio Manel Cráneo está a expor a mostra Escapada ao Planeta Mincha na Fundación Luís Seoane (rúa de San Francisco s/n, 15001 A Coruña).

A exposición inclúe varias pezas en volume e 18 ilustracións con
diferentes ambientes das series do universo Planeta Mincha. Algunhas son ilustracións inéditas, outras
pertencen á colección de libros «Diario de Pichük» e
outras xa formaron parte da mostra titulada Estampas do Planeta Mincha, de 2012.

Foto da noticia: Demo Editorial

O primeiro libro para nenos escrito polo cantante portorriqueño Ricky Martin, Santiago el soñador — Entre las estrellas, será publicado o próximo 14 de novembro, en versións española e inglesa, e estará ilustrado pola nosa socia Patricia Castelao. O volume será editado por Celebra, un selo de Penguin Group.

Varios medios recollen máis detalles desta noticia, como este artigo do diario Abc.

Desde hoxe ata o próximo 21 de setembro, o noso socio José Domingo expón orixinais na galería de arte L’indiscret Showroom (carrer de Milá i Fontanals 46, 08012 Barcelona). A mostra titúlase Exposición efímera. Pode encontrarse máis información aquí.

«A debuxar con Marcopola» é o título do obradoiro de cómic que o noso socio Jacobo Fernández Serrano coordinará este xoves, 19 de setembro, a partir das 18:00 h, na Biblioteca do Fórum Metropolitano (rúa Río Monelos 1, 15006 A Coruña). O taller está dirixido a cativos de entre 6 e 10 anos, e baséase na serie de cómic Marcopola, a illa remeira.

O libro O gato fantasma, escrito por Xelís de Toro e ilustrado pola nosa socia Almudena Aparicio, chegou estas semanas ás librarías galegas da man de Edicións Xerais.

Almudena ten sido noticia este verán tamén por ser a gañadora do Plum Pudding Competition 2013, organizada no último IlustraTour pola Plum Pudding Illustration Agency e a editorial británica Egmont.

O noso socio Xosé Tomás será, xunto con Miguel Vázquez Freire, profesor da nova escola de ilustración O Neno Amarelo, que abre mañá o prazo de matrícula ata o día 2 de outubro. A escola, que terá a súa sede na cidade de Santiago (San Martiño Pinario, praza da Inmaculada 5, 15704 Santiago de Compostela), ofrece un curso de 40 horas de duración, as tardes dos venres do último trimestre deste ano, e está limitada a un máximo de 15 alumnos. O programa completo do curso pode verse aquí.

Xosé Tomás tamén comeza este mes os seus obradoiros de ilustración e cómic —dirixidos a público infantil e xuvenil— na Libraría Biblos (rúa de Santiago 4, 15300 Betanzos, A Coruña), e están dispoñibles as últimas prazas para participar.

Este sábado, 7 de setembro, o noso socio Fran Jaraba presentará a súa novela gráfica División Azul, na Fnac Callao (Preciados 28, 28013 Madrid). Será ás 19:00 h.

O álbum conta a peripecia de Santi, un mozo que se alista na División Azul para cumprir unha misión encomendada polo partido comunista alemán.

Contos por teléfono, o libro escrito por Gianni Rodari en 1960 e ilustrado en 2011 polo noso socio Pablo Otero para a tradución galega de Carlos Acevedo, é un dos nove títulos propostos pola Organización Española para o Libro Infantil e Xuvenil (OEPLI) para formar parte da Lista de Honra da Organización Internacional do Libro Xuvenil (IBBY). A Lista de Honra é «unha selección bienal de libros excepcionais de publicación recente, en honor a escritores, ilustradores e tradutores dos países membros da organización».

Dos nove títulos, só outro ten autores galegos: Palabras de auga, escrito por Marcos Calveiro e ilustrado por Ramón Trigo.