AGPI – Asociación Galega de Profesionais da Ilustración

Categoría: eventos

  • DÍA DA ILUSTRACIÓN 2022

    DÍA DA ILUSTRACIÓN 2022

    Coincidindo coa efeméride do nacemento de Castelao (30 de Xaneiro), celébrase unha nova edición do Día da Ilustración, que visibiliza ao sector da ilustración e lembra a sobranceiros artistas e o seu legado. O homenaxeado deste ano é Reimundo Patiño.

    Reimundo Patiño (A Coruña 1936-1985). Pioneiro da arte contemporánea galega, tivo un temperán contacto coa obra de Seoane, Castelao e Souto. Os seus primeiros cadros datan de 1953 cando pintou a serie “As sardiñas”.

    En 1958 trasládase a Madrid. Alí descubre a pintura de vangarda e participa na fundación do grupo Brais Pinto. Foi un dos fundadores do partido independentista UPG en 1964 e militante ata o 1971. Ano no que fundou a primeira galería experimental de Madrid, onde expuxo por vez primeira o cómic mural “O home que falaba vegliota”. Impulsor do movemento A Gadaña (pioneiro da arte informalista en Galicia) e o colectivo Estampa Popular Galega, que produciu gravados, obra gráfica e carteis cun forte compromiso sociopolítico.

    A figura de Patiño transcende a etiqueta de artista polo seu pensamento e activismo político na cultura galega da posguerra. Nos anos 60 e 70, o piso de Reimundo en Madrid era un salientable lugar de reunión. Participou en mostras do grupo Atlántica. Finou en A Coruña pouco antes de cumprir 50 anos.

    Na web do evento www.diadailustracion.gal, pódese consultar tamén máis información sobre Reimundo Patiño así como as actividades programadas para estes días nas bibliotecas de Galicia.

    A Biblioteca de Galicia (Santiago de Compostela) acolle a mostra de Reimundo Patiño: “O desacougo creador”. Que terá lugar dende o 28 de xaneiro ata o 10 maio con entrada libre e gratuíta. Ademáis nas distintas bibliotecas públicas e nas escolas de arte de Galicia atoparemos: Obradoiros, exposicións e actividades.

    Alberto Díaz, Aarón Moucho, Sandra Lodi e Andrea López foron convidados pola AGPI como ilustradores e ilustradoras de diferentes miradas, para que fixesen unha obra sobre aquel aspecto de Reimundo Patiño que máis lles inspirase. Todas as obras poden consultarse tamén na web antes citada.

    Os faladoiros deste ano serán retransmitidos online o 28 de xaneiro pola mañá, entre as 11.00 e as 14.00. O acceso ás charlas é totalmente libre, sen inscrición previa, e pódese seguir tanto pola web do Día da Ilustración, como polo facebook e a canle de youtube da AGPI.

    Os participantes nestas actividades serán: O humorista gráfico e ilustrador Xaquín Marín, que nos falará dun Reimundo Patiño co que estivo estreitamente vencellado, e Roberta Vázquez que nos falará da súa obra e proxectos persoais.

     

    Programa:

    VENRES 28 DE XANEIRO

    11: PRESENTACIÓN.

    11:10 XAQUÍN MARÍN: VIAXE CON REIMUNDO PATIÑO

    12:40 CONVERSA COA ILUSTRADORA ROBERTA VÁZQUEZ

     (Conducido por Neves Rodríguez)

     

    O Día da Ilustración é unha iniciativa da Consellería de Cultura e Turismo da Xunta de Galicia en colaboración coa Asociación Galega de Profesionais da Ilustración (AGPI).

     

    Cartel do Día da Ilustración 2022, obra de Paula Mayor

  • Conversa sobre BD autoeditada na nova edición do Salón do Libro

    Conversa sobre BD autoeditada na nova edición do Salón do Libro

    Na AGPI sempre temos moitas ganas de cultura: de creala, de reivindicala e de expandila. E agora máis que nunca despois dun ano coma este. Por iso convidámosvos con especial ilusión ao próximo evento:

    O vindeiro sábado 8 de maio ás 19.30 h estaremos no XXII SALÓN INTERNACIONAL DO LIBRO INFANTIL E XUVENIL DE PONTEVEDRA no faladoiro “Meu dito, meu feito: unha semblanza sobre BD autoeditada”.

    Cristian Fojón, Inés Casajeros e Miguel Porto serán os encargados de reflexionar e realizar interesantes achegas sobre BD, nunha conversa moderada por Óscar Iglesias no Salón de actos do Pazo da Cultura. O encontro é de balde, retransmítese tamén en streaming e precisa inscrición previa, entrando aquí para seleccionar a actividade e reservar praza.

    Cine, contacontos, obradoiros de tecnoloxía e audiovisual, pintura mural, exposicións, escola de escrita e conversas arredor de distintos procesos creativos completan o programa de actividades desta nova edición do Salón do Libro, á que estamos moi contentas de sumarnos.

    O cartaz gañador desta edición é obra da artista Aida Alonso, membro da AGPI, quen vén de realizar un prolífico e orixinal traballo de ilustración e collage.

    Agardámosvos o próximo 8 de maio para festexar xuntas o regreso paseniño da cultura.

    Cartaz de Aida Alonso.

  • DÍA DA ILUSTRACIÓN 2021

    DÍA DA ILUSTRACIÓN 2021

    O Día da Ilustración celébrase cada ano o 30 de xaneiro, coincidindo co día do nacemento de Castelao. Ademais de lembrar e reivindicar o papel dos profesionais da ilustración na industria cultural, cada ano é homenaxeado un ilustrador histórico galego. A protagonista deste ano é Lolita Díaz Baliño.

    Lolita Díaz Baliño (A Coruña, 1905-1963) foi unha pioneira artista multidisciplinar que desafiou as convencións sociais da época. Colaborou como ilustradora en diversas publicacións gráficas, como Mariñana, Galicia Gráfica ou Céltiga, amosando un estilo art déco sobrio e elegante, acorde coa moda propia do momento e tamén influencias do pensamento rexionalista.

    Exerceu tamén unha importante labor como docente e, o 13 febreiro 1938, convértese na primeira muller, xunto a Carme Corredoyra, en ingresar como académica na Real Academia Galega de Belas Artes; é a primeira muller en facelo.

    Lolita Díaz permaneceu incomprensiblemente esquecida durante moito tempo, a pesar de ser unha figura adiantada, que abriu camiño para moitas artistas que viñeron despois. Finalmente comeza a recibir o recoñecemento que merece.

    Como todos os anos, a AGPI (e co patrocinio da Consellería de Cultura e Turismo), produciu un vídeo viral sobre a autora, xa dispoñible na web do evento www.diadailustracion.gal, onde se pode consultar tamén máis información sobre Lolita Díaz así como as actividades programadas para estes días nas bibliotecas de Galicia.

    A Biblioteca de Galicia acolle a exposición «Lolita Díaz Baliño. A discreción imposta dunha grande artista». A mostra recolle documentos, libros, imaxes e obras de Fernández Mazas que forman parte da colección da Biblioteca e Arquivo de Galicia. A mostra inaugurarase o vindeiro 30 de xaneiro e poderase visitar ata o 13 de maio de 2021 no horario de 9:00 a 21:00, e con entrada libre e gratuíta

    Como novidade, a AGPI convidou a catro ilustradoras de diferentes ámbitos da ilustración, Lidia Cao, Nuria Figueiredo, Iria Ribadomar e Laura Romero, para que fixesen unha obra sobre aquel aspecto de Lolita Díaz que máis lles inspirase. Todas as obras poden consultarse tamén na web antes citada.

    Ademais, debido á emerxencia sanitaria actual, as charlas deste ano serán retransmitidas online o 29 de xaneiro pola mañá, entre as 10.30 e as 13.30. O acceso ás charlas é totalmente libre, sen inscrición previa, e pódese seguir tanto pola web do Día da Ilustración, como polo facebook e a canle de youtube da AGPI.

    As ponentes das dúas charlas serán Carla Berrocal, que nos falará da súa obra e proxectos persoais, e Rosario Sarmiento, que nos trazará un percorrido pola faceta ilustradora de Lolita Díaz. O acceso ás charlas é totalmente libre, sen inscrición previa, e pódese seguir tanto pola web, como polo facebook e a canle de youtube da AGPI. Este é o programa:

    · CHARLA CON ILUSTRADORA INVITADA: CARLA BERROCAL  29 de xaneiro ás 10:30

    · CHARLA: ‘LOLITA DÍAZ BALIÑO: A ILUSTRADORA DOS SOÑOS’ Con Rosario Sarmiento 29 de xaneiro ás 12:10 

    (Ambas charlas serán conducidas por Neves Rodríguez)

    Agradecemos por suposto toda a difusión que lle dedes ao evento. 

    Apertas para todos!

    Cartaz por Manel Cráneo
  • 17 Encontro Galego de Ilustración

    17 Encontro Galego de Ilustración

    A AGPI realiza un ano máis o seu Encontro Galego de Ilustración o próximo sábado 14 de novembro. Esta decimosétima edición, a primeira que se desenvolve integramente online, aborda a importancia da ilustración alén do campo editorial. A través das experiencias de creadores en distintos ámbitos, como os videoxogos, as apps móbiles ou o mundo audiovisual e escénico, o Encontro pretende ampliar a visión das aplicacións e posibilidades laborais desta disciplina artística.

    Os autores convidados para esta edición visibilizarán partes da nosa profesión menos coñecidas, en mercados crecentes e en clara expansión. Susy Broullón falará da súa aventura no mundo dos videoxogos, Javi de Castro das súas experiencias no mundo dixital e Montse Piñeiro amosará as posibilidades da interacción entre distintas disciplinas artísticas. Ademais, Isabel Méndez impartirá un obradoiro sobre un tema esencial da profesión: a protección dos dereitos de autor, tanto nos contratos como no incerto mundo da internet.

    Un programa completo para unha edición especial do Encontro, ao que queremos convidar, un ano máis, a todos aqueles que gozan coa Ilustración. As actividades, que se emitirán en directo en formato webinar, están abertas a todo o público e son gratuítas. É precisa a inscrición previa nesta ligazón. Faino o antes posible, que as prazas son limitadas!  

    O 17 Encontro Galego de Ilustración está organizado pola AGPI co apoio da Consellería de Cultura e Turismo da Xunta de Galicia.

    Toda a información sobre o programa e a inscrición no obradoiro pode atoparse aquí.

    Encontro_2020

  • Encontro de Ilustración no Salón de Pontevedra

    Encontro de Ilustración no Salón de Pontevedra

    Actualización (12/3/2020): o organización do Salón cancelou todas as actividades, seguindo as instrucións da Xunta de Galicia e o Ministerio de Sanidade, que recomendaban a suspensión de eventos masivos. O Encontro de ilustración queda, pois, tamén cancelado.

    O próximo venres 13 de marzo, dentro do programa do Salón do Libro Infantil e Xuvenil de Pontevedra, terá lugar ás 17:30 un Encontro profesional de ilustración, no Pazo da Cultura de Pontevedra (rúa Alexandre Bóveda, s/n, 36005 Pontevedra). A actividade está organizada pola AGPI en colaboración co Salón, e constará dunha charla e unha mesa redonda.

    A charla terá como título «O poder de asociarse»; nela explicarase o traballo que se realiza desde a asociación e cales son os motivos da súa existencia. A continuación, a mesa redonda «Un ilustrador na miña cidade. Crear comunidade» reunirá os Ilustradores pontevedreses Berto Fojo, Natalia Umpiérrez e Diego Estebo, moderados por Bea Lema. Falarán de como entenden o asociacionismo e de como é traballar desde Galicia nun mundo global.

    A asistencia ao encontro é gratuíta, mais é preciso inscribirse escribindo ao enderezo ponteilustra@gmail.com.

  • Comezan as sesións do Clube de Debuxo en Vigo con wáter-polo

    Comezan as sesións do Clube de Debuxo en Vigo con wáter-polo

    O Clube de Debuxo, organizado pola AGPI, que ata agora desenvolveu maioritariamente as súas sesións na cidade da Coruña, chega este mes de marzo a Vigo. Farao cunha sesión de debuxo durante un adestramento do equipo de wáter-polo do Real Club Náutico de Vigo. Será no propio Real Club Náutico (rúa das Avenidas, s/n, 36202 Vigo), o próximo venres 6 de marzo, de 21:30 a 22:30.

    Como nas anteriores ocasións, o Clube de Debuxo está dirixido a ilustradores, animadores, debuxantes de cómic e estudantes de ilustración. É unha actividade tanto para socios como para non socios da AGPI. As prazas, totalmente gratuítas, son limitadas e outórganse por rigorosa orde de inscrición, mediante o formulario electrónico http://bit.ly/32uwo3Q. O prazo de inscrición estará aberto ata o 5 de marzo.

    A sesión desenvolverase na piscina cuberta do Real Club Náutico de Vigo. A piscina dispón dunha zona de gradas onde acomodarse. Recoméndase ás persoas inscritas levar auga e roupa fresca, dado que na zona onde se realizará a sesión vai moita calor. A sesión comezará con puntualidade e só se poderá acceder ao recinto co grupo de inscritos.

    O Clube de Debuxo naceu coa intención de realizar unha práctica interesante rodeados de compañeiros, ademais de crear un punto de encontro entre profesionais onde compartir as nosas experiencias e inquedanzas. Anteriormente realizáronse sesións de debuxo nun ensaio da Sinfónica de Galicia, na piscina municipal do Club do Mar da Coruña, no Mercado de Verdura de Vilagarcía e nun ensaio de danza no Teatro Rosalía de Castro da Coruña, así como en varias ocasións cun modelo en vivo na Fundación Luís Seoane. A partir de agora, amplíase o número de lugares de realización do Clube, e unha das localidades habituais será Vigo.

    Ilustración de Martín Romero
  • Sesión do Clube de Debuxo da Coruña, con debuxo de modelo

    Sesión do Clube de Debuxo da Coruña, con debuxo de modelo

    A cita de febreiro do Clube de Debuxo, iniciativa da Asociación Galega de Profesionais da Ilustración, volve adoptar a forma de sesión de debuxo con modelo en vivo na Fundación Luis Seoane (rúa San Francisco, 27, 15001 A Coruña), este venres, 21 de febreiro, de 19:00 a 21:00. 

    Como vén sendo habitual, para permitir realizar un debuxo áxil, as poses do modelo serán curtas, de entre un e dez minutos, e o recomendable será moverse pola sala, aínda que haberá cadeiras para quen queira. 

    As actividades do Clube de Debuxo están dirixidas a ilustradores, animadores, debuxantes de cómic e estudantes de ilustración. No caso dos socios da AGPI, a actividade é gratuíta, pero aos non socios nesta ocasión pediráselles un donativo de 2 euros (na propia sala), para cubrir o pagamento do modelo. Cada asistente, como é habitual, debe levar o seu propio material de debuxo. Para realizar a inscrición, só hai que cubrir este formulario en liña. As prazas son limitadas, e serán adxudicadas por rigorosa orde de inscrición.

    Esta é a oitava sesión do Clube de Debuxo; anteriormente realizáronse outras na propia Fundación Luis Seoane, nun ensaio da Sinfónica de Galicia, na piscina municipal do Club do Mar da Coruña, no Mercado de Verdura de Vilagarcía e nun ensaio de danza no Teatro Rosalía de Castro da Coruña.

    O Clube de Debuxo naceu coa intención de realizar unha práctica interesante rodeados de compañeiros, ademais de crear un punto de encontro entre profesionais onde compartir as nosas experiencias e inquedanzas. A partir de agora, as sesións do Clube comezarán a realizarse tamén noutras localidades galegas, que se anunciarán en breve.

  • Cuarta edición de Allariz Debuxado

    Cuarta edición de Allariz Debuxado

    O venres 31 de xaneiro e o sábado 1 de febreiro decorrerá na vila de Allariz o IV Allariz Debuxado – Festival da Arte da Ilustración, que se insire nas actividades que celebran o Día da Ilustración.

    O programa desta edición comeza o 31 de xaneiro ás 12:00 no Fogar dos Maiores (Campo da Barreira, 3, Allariz) coa inauguración do festival; intervirán a alcaldesa de Allariz e mais o director de Aira editorial, César Lorenzo Gil. A continuación, David Lafuente falará de «Cómo ser dibujante (y que te paguen)».

    Xa pola tarde, ás 17:00, a charla será de Ester García e titularase «Detrás del telón». Despois, ás 19:00, Tomás Hijo impartirá o relatorio «Ilustrando a Tolkien y Lovecraft. Gracias y desgracias del “fan art”».

    Pola noite, ás 23:00, no Café Catro Portiñas (Rúa de Emilia Pardo Bazán, 11), haberá un concerto do dúo Piratas sen Parche.

    O 1 de febreiro, durante todo o día e de forma ininterrompida, entre as 11:00 e as 20:00, terá lugar na Praza de Abaixo a III Feira da Creación (en caso de mal tempo, a feira trasladarase ás instalacións do Museo do Coiro, situado na rúa da Granxa).

    Mentres tanto, na Fundación Vicente Risco (rúa de San Lourenzo, 3), continuarán as actividades. Ás 11:45, presentarase a novela gráfica Grandarroiba, de Cristian F. Caruncho. A partir das 12:30, haberá micropresentacións de artistas emerxentes, e entre as 11:45 e as 13:30, sinaturas de obras dos autores participantes no festival. Finalmente, ás 17:00, Manel Cráneo falará da experiencia de Demo Editorial.

    Cartel a cargo de Miguel Robledo
  • Vídeo homenaxe a Cándido Fernández Mazas

    Vídeo homenaxe a Cándido Fernández Mazas

    Un dos obxectivos do Día da Ilustración é recuperar e dar a coñecer ao gran público figuras históricas da ilustración en Galicia. Este ano, o artista e escritor Cándido Fernández Mazas é o que merece esa homenaxe. Fernández Mazas (Ourense, 1902 – Castro Caldelas, 1942) colaborou como ilustrador en libros, revistas como Nós ou Alfar e xornais como La Zarpa, Galicia, El Pueblo Gallego ou Política. En París tomou contacto coas vangardas artísticas, e durante a Segunda República participou nas actividades culturais das «Misións pedagóxicas» realizando carteis e decorados para o seu teatro de monicreques. Ao final da Guerra Civil foi encarcerado, o que afectou seriamente a súa saúde, e morreu sen chegar a cumprir os corenta anos. Despois de moitos anos de esquecemento, afortunadamente a súa obra foi reivindicada a finais dos anos oitenta.

    Como cada ano, entre outras actividades, a AGPI produce, en colaboración coa Dirección Xeral de Políticas Culturais da Xunta de Galicia, un vídeo que repasa nun par de minutos a vida e a obra do autor homenaxeado.

    Como nas edicións anteriores (Álvaro Cebreiro en 2017, Camilo Díaz Baliño en 2018 e Federico Ribas Montenegro en 2019), o guión corre a cargo de Alberto Guitián, e a música vén da man de Roberto Casteleiro, que nesta ocasión versiona un tema de Erik Satie —un dos músicos favoritos de Fernández Mazas—. A animación e montaxe do vídeo é responsabilidade este ano de Martín Romero, coa colaboración de Isabel Vila.

    Toda a información sobre Fernández Mazas e o resto das actividades relacionadas con el e co Día da Ilustración, nesta ligazón.

  • Día da Ilustración 2020

    Día da Ilustración 2020

    O Día da Ilustración celébrase en Galicia cada ano o 30 de xaneiro, coincidindo co día do nacemento de Castelao. Ademais de lembrar e reivindicar o papel dos profesionais da ilustración na industria cultural, cada ano é homenaxeado un ilustrador histórico galego. O protagonista deste ano é Cándido Fernández Mazas.

    Cándido Fernández Mazas (Ourense, 1902 – Castro Caldelas, 1942) foi artista e escritor, e colaborou como ilustrador en publicacións como Nós ou Alfar. Ilustrou numerosos libros e asinou baixo distintos pseudónimos en xornais como La Zarpa, Galicia, El Pueblo Gallego ou Política. En 1925 obtivo unha bolsa para estudar arte en París, onde entrou en contacto coas vangardas. Durante a Segunda República, participou nas actividades culturais das «Misións pedagóxicas» realizando carteis e decorados para o seu teatro de monicreques. A súa saúde psíquica e física quedou seriamente afectada pola Guerra Civil; morreu sen chegar a cumprir os corenta anos.

    A Biblioteca de Galicia acollerá a exposición «Cándido Fernández Mazas: signos dunha quimera», con documentos, libros, imaxes e obras de Fernández Mazas que forman parte da colección da Biblioteca e Arquivo de Galicia. A mostra inagurarase o 30 de xaneiro ás 11:00, e poderá visitarse ata o 29 de maio na sala de exposicións da Biblioteca de Galicia, no Monte Gaiás. Nos próximos días presentarase o vídeo de homenaxe que produce a AGPI coa colaboración da Dirección Xeral de Políticas Culturais, e que tamén se proxectará na mostra.

    Ademais, no programa de actividades previsto para as bibliotecas públicas e escolas de arte galegas, hai unha mostra sobre o autor homenaxeado na bilioteca pública de Pontevedra, e o estudoso da súa obra José Manuel Bouzas dará unha charla na EASD Antonio Faílde de Ourense o 29 de xaneiro ás 12:00.

    Por parte da AGPI (e co patrocinio da Consellería de Cultura e Turismo), están previstas actividades na EASD Pablo Picasso da Coruña os días 29 e 30 de xaneiro. O 29, a partir das 19:00 presentarase o Día da Ilustración e a continuación haberá unha charla co autor convidado Jesús Cisneros, que chega a Galicia despois de impartir talleres en lugares como Marsella, Seúl ou Bangkok. O 30, para as persoas previamente inscritas (as prazas están xa esgotadas), Cisneros impartirá un obradoiro de máscaras no mesmo lugar.

    No resto de bibliotecas públicas haberá diferentes mostras, obradoiros e charlas con ilustradores como María Lires, Jorge Campos, Laura Núñez, Pablo Otero ou Xulia Pisón, que é ademais a autora do cartel do Día da Ilustración deste ano. Pola súa parte, o Club de Prensa de Ferrol tamén se sumou este ano á celebración cun acto de homenaxe a Fernández Mazas na Biblioteca Municipal ferrolá.

    O Día da Ilustración é unha iniciativa da Consellería de Cultura e Turismo da Xunta de Galicia en colaboración coa Asociación Galega de Profesionais da Ilustración (AGPI).

    Cartel do Día da Ilustración 2020, obra de Xulia Pisón