Autor: admin

A Casa Museo Casares Quiroga (rúa das Panadeiras 12, 15001 A Coruña) acolle estes días a exposición Miradas sobre la Torre. Nela recóllese a visión persoal de Manolo Gómez, Otero Regal e o noso socio Suso Cubeiro acerca da mitoloxía que rodea a coruñesa Torre de Hércules.

Así, a obra de Manolo Gómez fai unha interpretación das doce
probas de Hércules, mesturando a impresión dixital e a pintura acrílica; Otero Regal, pola súa parte, recrea lendas a través do gres porcelánico; e Suso Cubeiro emprega ilustracións a lapis e acuarela para se achegar a pasaxes relativas a Hércules e a Breogán.

A punto de publicar en España o segundo tomo de El héroe (na web de Astiberri, a súa editorial, apareceu esta semana unha entrevista acerca do proxecto que chega agora a termo), David Rubín viaxa a París, onde esta tarde presenta a versión francesa da primeira parte (Le héros – Livre 01), publicada pola editorial Rackham. Haberá dúas sesións de autógrafos, hoxe e o sábado 24.

Xa o día 30 de novembro, David estará en Madrid asinando exemplares das súas obras nas VII Jornadas Comiqueras Fnac/SD, na Fnac Callao (Preciados 28, 28013 Madrid).

Actualización: no blog de David poden encontrarse todas as citas da súa estadía en Madrid, onde participa tamén no salón Expocómic, nunha presentación do seu libro na libraría Generación X e na inauguración da exposición de orixinais seus no Café Molar.

O escritor e xornalista Pemón Bouzas presenta hoxe, día 21, a súa novela xuvenil A Estrela de Oriente (Unha historia dos Reis Magos), editada por Xerais. A obra achégase a «un dos grandes mitos de Occidente», e está ilustrada polo noso socio Marcos Calo.

O acto de presentación será ás 20:00 h na Libraría Couceiro (praza de Cervantes 6, 15704 Santiago de Compostela), e contará coa participación do autor e mais a do director de Xerais, Manuel Bragado.

Unha carta aberta, asinada por centos de persoas ligadas ao ámbito do cómic (entre eles, varios dos socios da AGPI), así como colectivos como a Federación de Asociaciones de Ilustradores Profesionales (FADIP), foi feita pública onte como medida de protesta contra a supresión das bolsas outorgadas por AlhóndigaBilbao.

A nota de prensa que acompaña a carta considera as bolsas como «un referente fundamental no campo da BD nas nosas fronteiras, e fóra delas», e como «unha iniciativa pioneira cuxa traxectoria fica truncada coa súa drástica cancelación». «Unha bolsa única en España», continúa a nota, «recoñecida a nivel internacional, convertida nun exemplo a seguir». Nos seus cinco anos de existencia, a bolsa «obtivo excelentes resultados» en proxectos que se desenvolvían na Maison des Auteurs de Angoulême (Francia): Clara Tanit, Lola Lorente, Álvaro Ortiz, Alfonso Zapico e o noso socio Martín
Romero.

A carta aberta recibiu o apoio non só de figuras do cómic nacional, como Max, Felipe Hernández Cava ou Miguel Gallardo, senón tamén do ámbito internacional, como Art Spiegelman, Chris Ware ou Benoît Peeters.

Mañá, 21 de novembro, a nosa socia Emma Ríos inaugura unha exposición na céntrica libraría londiniense Orbital Comics.

Trátase dunha pequena retrospectiva do traballo desenvolvido por ela en series como Osborn, Cloak & Dagger, The Amazing Spider-Man, Captain Marvel, Doctor Strange Season One ou Prophet, e poderá visitarse ata o día 4 de decembro.

Ademais, entre o 8 e o 9 de decembro Emma será unha das convidadas do Malta Comic Con, na Valeta.

O novo libro-CD-DVD de Mamá Cabra, Bicos de música, está xa nas librarías.

O volume, publicado por Editorial Galaxia, contén dez cancións, dez historias e un audiovisual, e, como sucedeu en anteriores ocasións neste proxecto, conta coas ilustracións da nosa socia Kristina Sabaite.

Este venres, 23 de novembro, o libro será presentado cun concerto na Biblioteca Pública Ánxel Casal (avenida de Xoán XXIII s/n, 15704 Santiago de Compostela), a partir das ás 18:30 h.

Titoán, segundo volume da serie de oito entregas creada por Inacio Viñariño e Iván Suárez sobre a vida de Castelao, será presentado esta tarde na Librería Komic (rúa San Pedro de Mezonzo 34, 15701 Santiago de Compostela) a partir das 18:00 h. Os autores asinarán exemplares das súas obras, e estarán acompañados polo director da editorial, Demo, o noso socio Manel Cráneo.

Maña, sábado 10 de novembro, terá lugar no concello de Amoeiro (Ourense) un SketchCrawl ou maratón de debuxo e graffiti.

En caso de bo tempo, os participantes reuniranse ás 9:30 h en Cornoces; a partir das 13:30 h desprazaranse á vila de Amoeiro para a segunda sesión. Se chovese, o punto de reunión sería o pazo da Fundación Otero Pedrayo (Pazo de Trasalba, Trasalba, 32172 Amoeiro), onde se desenvolvería a actividade de 10:30 a 17:00 h.

Polo que se refire aos grafiteiros, comezarían ás 12:00 h nas
piscinas Costa do Monte, e en caso de chuvia no polideportivo de
Amoeiro

O concello de Amoeiro convidará a petiscos ao mediodía, polo que se pide confirmación de asistencia a través da páxina da actividade en Facebook.

O programa de TVE Desde Galicia para el mundo dedicou unha ampla reportaxe, de case media hora de duración, á banda deseñada galega, desde as súas orixes ata a actualidade. Entre outras moitas cuestións, como entrevistas á investigadora Charo Crespo, a Miguelanxo Prado ou a Kiko da Silva, houbo espazo para falar do labor da AGPI, da man do seu presidente Santy Gutiérrez, e dos últimos traballos de socios como Manel Cráneo, Emma Ríos ou David Rubín.

Pode accederse aos vídeos desde a web do programa, ou ben a través destes links: 1 2 3 4.

Varios socios da AGPI participan na Exposición-Homenaxe a Blanco Amor que pode visitarse no Museo do Humor de Fene (Casa da
Cultura, avenida de Conces 20-22, 15500 Fene) ata o próximo 23 de novembro. A mostra está comisariada por Siro López, e encádrase nos actos
organizados polo Concello de Fene pola convocatoria da 30.ª edición do Premio de Novela Longa Eduardo Blanco Amor.

Na exposición exhíbese obra gráfica inspirada na obra e na vida do escritor ourensán, a cargo de Aida Alonso, Almudena Aparicio, Augusto Metztli, Calros Silvar, Dani Padrón, Gonzalo Vilas, Idoia de Luxán, Jaime Asensi, Michel Casado, Miki, Nachortas, Pablo Otero, Pinto e Chinto, Santy Gutiérrez, Siro López, Xan Carpente, Xosé Cobas e Xosé Lois (Carrabouxo).

Nesta galería poden verse as obras expostas.