Autor: admin

A AGPI organiza o terceiro Drink & Draw Vigo, que terá desta vez o tema «Kaiju Battle». Os eventos Drink & Draw son unha actividade lúdica relacionada
con pequenos retos de debuxo cunha limitación de tempo, e están abertos á
participación de calquera persoa interesada. Neste caso, cada participante deberá levar deseñado o seu propio kaiju, e durante a actividade debuxará unha viñeta co ataque ao contrincante asignado; as viñetas someteranse a votación.

A periodicidade do Drink & Draw Vigo é mensual, e cada edición realízase nun local distinto; nesta ocasión, é no café Detrás do Marco (rúa Londres s/n, 36202 Vigo), este serán, a partir das 21:00 h. Máis información, na páxina en Facebook do Drink & Draw Vigo.

^{Deseño e ilustración do cartel: Bernal Prieto}
Mañá, sábado 7 de xuño, desenvolverase en Santiago o segundo Debate sobre o Estado da Ilustración. Será no Centro Cultural Fundación Novacaixagalicia en Santiago (rúa do Vilar 19, 15705 Santiago de Compostela), a partir das 10:30 h, con entrada libre e gratuíta.

Entre os puntos propostos para abrir o debate están: «a crise: como afecta aos modelos de encargo»; «os prezos: a evolución dos números»; «a formación dos ilustradores: novas xeracións de futuro incerto»; «os mercados internacionais: cal é a súa viabilidade como saída laboral»; «as parcelas colindantes ao noso sector: estado actual»; «o autoemprego: alternativas de negocio»; e «o financiamento: onde están os cartos?».

Os relatores convidados son os ilustradores Patricia Castelao, Leandro, Santy Gutiérrez e Dani Padrón, con Manel Cráneo como moderador. O público presente poderá participar no coloquio desde o primeiro momento.

O debate decorrerá ata o mediodía, e a media mañá haberá unha pausa para café no propio recinto.

O estudio Algarabía Animación estrea hoxe, con motivo do Día Mundial do Medio Ambiente, unha peza de animación «para fomentar os bos hábitos en torno ao consumo responsable e a reciclaxe», inspirada neste caso polo feito de a ONU ter dedicado o día este ano ás consecuencias que sofre a poboación das
illas a causa do quecemento global.

O vídeo, de dous minutos de duración, ten como protagonista o personaxe Micho Pocho, creación da nosa socia Lucía Gómez.

Mañá, xoves día 5, ás 20:00 h, preséntase o número 1 do fanzine Compota de Manatí na Libraría Paz (rúa da Peregrina 29, 36001 Pontevedra).

O acto contará coa presenza dos nosos socios María Álvarez, Yago García e Jorge Peral, todos eles membros do Colectivo Miñoco, que falarán das novidades do número, así como do proceso de traballo nel empregado.

Onte vendíase, coa edición dominical do xornal El País, a entrega correspondente da colección de contos infantís «Mi primer libro», composta por títulos publicados orixinalmente por Alfaguara; en concreto, tratábase de Ven a buscarme, escrito por Javier Marías e ilustrado pola nosa socia Marina Seoane.

Por outro lado, durante a Feria del Libro de Madrid, Marina participará en varias sesións de sinatura dos seus libros. Así, mañá, día 3, estará na caseta da Librería Antonio Machado (a n.º 320), en horario de tarde, e o mércores estará entre as 18:30 e as 20:30 h na caseta de El Dragón Lector (a n.º 63). Entre os libros cuxos exemplares firmará estará un dos seus últimos traballos, El elixir curalotodo, que está a comezar a súa andaina no mercado.

Desde o pasado 24 de maio ata o 5 de xuño pode verse no Espazo Pop Up B58 (rúa Barcelona 58, 15010 A Coruña) a mostra Agra Expón, unha exposición colectiva de diferentes artistas vinculados ao barrio coruñés da Agra do Orzán na que participan Begoña Pastoriza, Fran Moledo, Selene Orozco, Miguel Mariño, Inma Doval, Xacobe Meléndrez, David Pazos, Rebeca Barral e os nosos socios Manel Cráneo e Rubén Mariño. Como actividades englobadas dentro da exposición, hoxe ás 20:00 h haberá unha charla titulada «Animación experimetal xaponesa», a cargo de David Pazos, e mañá, sábado 31, proxectarase ás 13:00 h o documental Agra do Orzán: O barrio dos músicos, amenizado cun concerto de blues da banda De Catro a Catro.

Zuguaanu significa en zapoteco «estamos de pé». Trátase dunha exposición de pinturas, ilustracións e obxectos feitos por Marthazul e o noso socio Augusto Metztli. Moitas das pezas están baseadas en cancións de músicos latinoaméricanos. En palabras dos seus autores, «durante séculos en Latinoamérica debemos gritar “Estamos de pé” a pesar de todo, a pesar do Norte e a pesar de nós mesmos; e agora parece que en Europa también». A inauguración será mañá, 31 de maio, ás 20:00 h, na galería Tlapaltic (rúa de Edelmiro Trillo 19-1º C, 36600 Vilagarcía de Arousa).

^{Deseño e ilustración do cartel: Bernal Prieto}
Despois do éxito da primeira edición, chega o II Debate sobre o Estado da Ilustración, que organiza novamente a AGPI. Será o sábado 7 de xuño pola mañá, a partir das 10:30 h, no Centro Cultural Fundación Novacaixagalicia en Santiago (rúa do Vilar 19, 15705 Santiago de Compostela). Este ano intervirán na mesa redonda os nosos socios Patricia Castelao, Leandro, Santy Gutiérrez e Dani Padrón, e de novo actuará de moderador e mestre de cerimonias Manel Cráneo.

O obxectivo é repasar os problemas que afrontan os profesionais do mundo da ilustración e tentar albiscar algunhas solucións colectivas, coa consciencia de que o simple acto de compartir información é xa un elemento importante a favor. Búscase que nesta ocasión o debate sexa máis áxil, de forma que o moderador irá suscitando temas, e o público poderá intervir desde o primeiro momento. O debate estará aberto a todas as persoas interesadas, e anímase a asistir a todos os ilustradores e ilustradoras, sexan ou non socios da AGPI.

_{Cartel deseñado por Bernal Prieto, sobre ilustración de Alberto Guitián}

A noite do venres 30 en Vigo e a do sábado 31 de maio na Coruña, a AGPI ten preparados eventos lúdicos abertos ao público que servirán de colofón a dúas xornadas dedicadas á ilustración, xa que esas mesmas tardes se impartirá o curso Soy ilustrador, ¿y ahora qué?, na EMAO de Vigo e na Fundación Luís Seoane da Coruña, respectivamente.

O IlustraNoite é un formato de presentacións multimedia onde varios profesionais de diversos campos da ilustración fan un percorrido pola súa obra de forma breve e áxil, ao estilo dos pecha kucha. Ata agora, a AGPI xa organizou dúas edicións do IlustraNoite, coincindo cos Cursos AGPI desenvolvidos en 2012 e 2013.

O IlustraNoite 2014 en Vigo (o cartel, aquí) decorrerá no café Detrás do Marco (rúa Londres s/n, 36202 Vigo), o venres 30 de maio a partir das 21:30 h. Poderán verse presentacións dos ilustradores Carlos Trigo, Carlos Rodríguez (Duplo Studio), Xpen, Laura Comesaña, Jano, Raúl Bermúdez, Anxo Fariña, Abi, Sozosuru e Tayone.

Pola súa parte, o IlustraNoite 2014 na Coruña (ligazón ao cartel) será no bar Old School (rúa División Azul 8, 15005 A Coruña), o sábado 31 de maio a partir das 22:30 h. As presentacións neste caso serán de Cascanueces/Bululú, Roque Romero, Irene Sanjuán, Cestola na Cachola, Leandro, David Pintor, Iria do Castelo, Perrilla, Miguel Fernández e Carlos Arrojo.

A II Semana del Dibujo y la Ilustración, que se desenvolve estes días no Museo Abc (calle Amaniel, 31 28015 Madrid), inclúe mañá pola mañá o taller De Tejada a Gustafson: la representación de pieles en la ilustración de moda, impartido pola nosa socia Marta Riera. O taller consiste en realizar unha ilustración centrada na representación de prendas de pel ou print animal, con demostración práctica a partir de diversos medios, como acuarela, pastel, lapis ou neocolor.

Pola tarde, Marta participará ademais na mesa redonda Ordenador, fotografía, dibujo… La importancia del dibujo en la moda, xunto cos ilustradores Berto Martínez e Chidy Wayne, con Carmen García Huerta como moderadora.