A
mostra Ilustradores galegos: habelos, hainos, organizada en colaboración coa AGPI polo XIII Salón do Libro
Infantil e Xuvenil de Pontevedra, pode visitarse no Pazo da Cultura da cidade do Lérez durante todo este mes, como xa se anunciou desde esta mesma web.
Desde esta ligazón pode accederse a fotografías do espazo da mostra (tomadas por Augusto Metztli), pero para ver as obras unha
por unha a AGPI habilitou unha zona na web coa exposición
completa en liña, á que pode entrarse aquí.
Jose Souto e o noso socio
Rubén Mariño expoñen,
durante todo o mes de marzo, unha mostra de caricaturas relacionadas
co rock ’n roll, baixo o título de 1 × 2 (1
tema × 2 autores).
Trátase dunha
serie de dez caricaturas (cinco pezas por autor), na que están
representados diferentes músicos. O público pode comprar as
obras expostas en formato postal, A4 ou A3. O lugar é o Café O
Alfaiate (rúa San Xoán 7, 15001 A Coruña).
Dentro dos II Encontros 8 de Marzo, subtitulados «Muller, arte e creatividade», serán inauguradas mañá, día 7, ás 20 h, dúas exposicións no Museo Municipal de Ourense (rúa de Lepanto 8, 32005 Ourense), baixo a organización do Colectivo Sociocultural Violeta.
Así, no primeiro andar haberá unha exposición de caricaturistas e ilustradoras; no segundo, outra de diferentes autoras que empregaron diversos formatos (pintura, escultura, tapiz, videocreación, fotografía).
As artistas presentes nas mostras son Asún Ada, Belén Andrade, Socorro Balvís-Castiñeiras, Ana-Olalla Castro, Colectivo METT03.04, Eva Domínguez, Aida Estrela, Flora Fernández, Natalia Figueiras, Natalia G. Devesa, Ana Iglesias, J. Jiménez, Charo López, Idoia de Luxán, Elena Malleira, Merçé, Elena Nieto, Olalla FL, Concha Outeiriño, Celia Parra, Pirusca, Luchi Polo, Raquel Rei, Esther Rodríguez Balboa, Iolanda Rodríguez, Raquel Rodríguez, Alba Rubín, Tareixa Taboada, María Vilar e Rosa Villar.
A Deputación de Ourense convocou hoxe dez bolsas destinadas a profesionais da animación e a banda deseñada
para unha estadía formativa de curta duración (4 días) na cidade francesa de Angoulême. As estadías incluirán
visitas á Cité Internationale de la Bande Dessinée et de l’Image (onde están, entre outros, os prestixiosos Maison des Auteurs e Musée de la Bande Dessinée), ao Pôle Image Magelis e toma de contacto con diversos colectivos de autores
franceses.
A actividade está incluída no programa do Programa Imagina Atlántica, proxecto cofinanciado polo FEDER, que une catro países europeos: España, Portugal, Francia e Gran Bretaña.
O noso socio Alberto Guitián estará mañá, venres 2 de marzo, ás 12:00 h, na Escola de Arte e Superior de Deseño Ramón Falcón (paseo dos Estudantes s/n, 27002 Lugo) a dar unha charla sobre ilustración e fondos para producións de animación.
Xa pola la tarde, a partir das 19:00 h na libraría Totem (praza de S. Domingo 3, galerías, 27001 Lugo), presentará o sketchbook Sólo tinta, e a continuación asinará exemplares dos seus álbums para o público interesado.
O XIII Salón do Libro Infantil e Xuvenil de Pontevedra, que se desenvolverá nesa cidade entre o 4 e o 31 de marzo, conta no seu programa cunha exposición organizada coa colaboración da AGPI. O título, dado que esta edición do Salón vai dedicada á superstición, é Ilustradores galegos: habelos, hainos.
A mostra está composta por dezanove ilustradores e ilustradoras da AGPI, escollidos pola organización do Salón. Así, Habelos, hainos contén obras de Manuel Lariño, Almudena Aparicio, Aida Alonso Vázquez, Luís Sendón, Minia Regos, Alberto García Ariza, Carmen Ferrín, Ana Santiso, Augusto Metztli, Pirusca, Kristina Sabaite, Matalobos, Tokio, Jorge Fernández Peral, Antonio Seijas, Noemí López, Eduardo Baamonde, Rubén Mariño e Hugo Covelo.
Proximamente, a AGPI fará dispoñible unha versión virtual da exposición desde esta mesma web.
O cartel da edición deste ano do Salón do Libro de Pontevedra é obra doutra socia nosa, Cristal Reza.
Actualización: xa se pode acceder á exposición en liña, desde esta ligazón.
Manolo López Poy e Miguel Fernández presentarán estes días en Galicia a súa obra El hijo de la ira, versión castelá da novela gráfica O fillo da furia publicada en colaboración por Demo Editorial e Diábolo Ediciones, que inclúe un anexo con contidos extras e material inédito.
Despois de ter feito presentacións desta nova versión en Madrid e Sevilla, os autores estarán mañá, venres 24 de febreiro, na libraría Totem (praza de S. Domingo 3, galerías, 27001 Lugo), e o venres 2 de marzo na libraría Kómic (rúa de San Pedro de Mezonzo 34, 15701 Santiago de Compostela), en ambos os casos ás 18:00 h.
Coincidindo coa segunda edición italiana de La tetería del oso malayo (La sala da tè dell’orso malese), o seu autor, David Rubín, estará no Instituto Cervantes de Roma o día 29 de febreiro, dando unha charla sobre o cómic español de hoxe; ademais, unha libraría romana acollerá o día 1 de marzo unha sesión de sinaturas dos seus libros.
Para a nova edición do libro, David Rubín realizou unha nova ilustración, que continúa a portada orixinal na parte posterior da cuberta; esta nova contraportada pode verse no avance que publica a editora, Tunué, na súa web.
Por outra parte, esta fin de semana David será un dos convidados do festival Carmona en Viñetas, onde participará nun encontro co público.
Birdboy, a curtametraxe de Pedro Rivero e Alberto Vázquez baseada na novela gráfica Psiconautas deste último, gañou onte o Goya á mellor curtametraxe de animación.
A cerimonia de entrega dos premios Goya tivo máis presenza do mundo da banda deseñada, xa que Arrugas, o filme que adapta a obra de homónima de Paco Roca, conseguiu non só o premio á mellor filme de animación senón tamén o de mellor guión adaptado.
Un fogar para Estrela, de Gabriel Prada en Vimeo.
O libro Un fogar para Estrela, escrito e ilustrado pola nosa socia Ánxeles Ferrer, ten xa booktrailer, a cargo de Gonzalo Lomba e Gabriel Prada. O volume será editado en breve por Everest Galicia.