AGPI – Asociación Galega de Profesionais da Ilustración

Etiqueta: banda deseñada

  • ‘El día 3’, Premio Nacional do Cómic 2019

    ‘El día 3’, Premio Nacional do Cómic 2019

    O Premio Nacional do Cómic foi outorgado onte a Cristina Durán, Miguel Ángel Giner Bou e Laura Ballester pola súa novela gráfica El día 3. O xurado escolleu esta obra «por saber realizar desde o respecto a crónica dun drama social, cunha narrativa en que se equilibran a emoción, a excelencia gráfica e o uso de potentes metáforas visuais». O premio, concedido polo Ministerio de Cultura e Deporte, está dotado con 20 000 euros e ten como obxecto «distinguir a mellor obra desta especialidade publicada en calquera das linguas do Estado durante o ano 2018».

    Para a realización da novela gráfica galardoada, os autores baseáronse nas investigacións de Laura Ballester, reflectidas no libro Luchando contra el olvido, el largo camino de las víctimas del metro de Valencia (2015); o proxecto da novela gráfica gañou no seu momento, en 2016, o Premio Ciutat de Palma de Còmic, e publicouse en 2018.

    Cristina Durán (Valencia, 1970) é licenciada pola Facultade de Belas Artes de Valencia. Como debuxante de BD ten publicado, xunto ao guionista Giner Bou, Una posibilidad entre mil (2009), La máquina de Efrén (2012) —recompilados ambos en 2017 nun volume integral co título de Una posibilidad— e Cuando no sabes qué decir (2015). Ten recibido varios galardóns, como o premio Turia, o Premi Dones Progressistes ou o accésit do trofeo Les BDs qui font la différence. Foi presidenta da Associació de Professionals de la Il·lustració Valenciana (APIV) e membro das directivas de FADIP e o EIF. Actualmente forma parte de AC (Colectivo de Autoras de Cómic).

    Miguel Ángel Giner Bou (Benetússer, Valencia, 1969) é licenciado pola Facultade de Belas Artes de Valencia. É profesor de guión e narrativa no Máster de Deseño e Ilustración da Facultade de Belas Artes de Valencia e na ESAT (Escuela Superior de Arte y Tecnología), e traballa como ilustrador. Foi presidente da APIV e actualmente preside ARGH!, a Asociación Profesional de Guionistas de Cómic.

    Laura Ballester é licenciada en Ciencias da Información, e fixo desde 2006 un seguimento exhaustivo do accidente do metro de Valencia, un traballo polo que recibiu o Premio do Ateneu Cultural de Torrent en 2012, o premio da Cartelera Turia á mellor contribución xornalística en 2014 ou o premio Libertad de Expresión 2016 da Asociación de Vecinos de Patraix. Ten traballado en El Punt, en medios de comunicación locais de radio e televisión, e na cooperativa Paleta d’Ocres.

    O xurado, presidido pola subdirectora xeral de Promoción do Libro, Begoña Cerro Prada, tivo como vogais a Ulises Ponce López, pola Asociación de Autores de Cómic de España (AACE); Asier Iturralde, pola FADIP; Gonzalo González Verdoy, pola Confederación Española de Gremios y Asociaciones de Libreros (CEGAL); Elena Masarah Revuelta, pola Asociación de Críticos y Divulgadores de Cómic de España; Jordi Teixidor, pola Real Academia de Bellas Artes de San Fernando; Berta Tapia Zamora, pola Federación de Asociaciones de Periodistas de España (FAPE); Graciela Padilla Castillo, polo Instituto de Investigaciones Feministas da Universidad Complutense de Madrid; e mais a autora galardoada na convocatoria de 2018, Ana Penyas.

  • Viñetas desde o Atlántico 2019

    Viñetas desde o Atlántico 2019

    Entre o 5 e o 11 de agosto, a cidade da Coruña recibe unha nova edición —a vixésimo segunda— do festival da banda deseñada Viñetas desde o Atlántico. Este ano, o festival ten como autores convidados a Abel Alves, Yolanda Castaño (como figura central do libro colectivo de BD O puño e a letra, baseado en poemas seus), Jorge Coelho, Isabel Greenberg, Albert Monteys, Antonio Navarro, David Sala e Tony Sandoval. Ademais das mostras monográficas correspondentes a estes autores, o evento contará tamén coas exposicións «¡Mil rayos! Tesoros de un tintinófilo», de Pedro Rey; as pranchas da obra gañadora do Premio Castelao 2018, «Canción para afundir flores no mar», de Oliver Añón; e «¿Pintas o dibujas? Un paseo por el arte de la mano del cómic», que conta con obras de Ana Galvañ, Antonio Altarriba / Keko, Fermín Solís, Laura Pérez Vernetti, María Hesse, Mauro Entrialgo, Max, Pablo Auladell e Santiago García / Javier Olivares.

    Como é habitual, o programa ten numerosas charlas e conferencias, presentacións, talleres e sesións de sinaturas, e ademais conta cunha feira especializada en cómic, co nome de «Rúa da BD». Nela, como vén sendo tradicional, a AGPI ten unha caseta, onde poden adquirirse as publicacións da asociación e tamén materiais xerados polos socios: láminas, fanzines e outros produtos de ilustración aplicada. Poden encontrarse así materiais de Carlos Arrojo, Sonia Corral, Miguel Cuba, Estefanía Domínguez Cagigao, Xosé Geada Uzal, Paula Mayor, Jorge Peral ou Luis Sendón, entre outros.

    Cartel do Viñetas 2019, sobre ilustración de Belén Ortega
  • II Encontro de Banda Deseñada Histórica de Galicia

    II Encontro de Banda Deseñada Histórica de Galicia

    Esta mañá presentouse a segunda edición do Encontro de Banda Deseñada Histórica de Galicia, que se desenvolverá en Lugo os días 25 de abril e 4 e 5 de maio. O encontro inclúe actividades para os amantes da historia, do debuxo e do cómic; segundo os seus organizadores, «contribúe a poñer en valor a importancia desta disciplina artística e, especialmente, a calidade de profesionais galegos».

    Está organizado por Demo Editorial e polo portal web Historia de Galicia, e conta coa colaboración da AGPI, entre outras entidades. O programa inclúe entre as súas actividades charlas, unha clase maxistral de ilustración, un obradoiro de debuxo para nenos e un roteiro histórico.

    Hoxe, xoves 25 de abril, o Encontro comeza cunha clase maxistral sobre cor dixital, da man do ilustrador Javi Montes, que traballa como colorista para as principais editoriais de cómic dos mercados americano e franco-belga, como Marvel, DC, Dargaud ou Le Lombard. Será ás 17:00, na Escola de Arte Ramón Falcón.

    A fin de semana do 4 e 5 de maio, o programa continuará con sesións teóricas, conferencias e obradoiros prácticos sobre banda deseñada histórica. O sábado 4 de maio, ás 10:00, organízase unha ruta histórica polo Lugo romano coa especialista en historia Lidia de la Fuente. A partir das 11:00, no CENTRAD, haberá un obradoiro para nenos impartido por Víctor Boullón; nel poderán aprender as principais técnicas da ilustración histórica (as inscricións poden realizarse nesta web). Ás 13:00, os autores participantes no Encontro asinarán libros na Librería Tótem.

    Na tarde do sábado, a sala central do CENTRAD acollerá varias conferencias e mesas redondas. Miguel Fernández falará ás 17:30 sobre banda deseñada ambientada na Galicia medieval; Manel Craneo, ás 18:30, acerca da banda deseñada histórica en Galicia; e Javi Montes e José Barreiro disertarán ás 19:30 sobre a banda deseñada histórica no mercado europeo.

    Como remate desta programación, o 5 de maio, ás 12:00 na Sala Clavicémbalo, proxectaranse filmes de ficción e documentais sobre banda deseñada e haberá unha sesión de contacontos históricos da man do actor e contacontos Avelino González.

    Cartel do Encontro, a cargo de Manel Cráneo
  • Terceiro Allariz Debuxado

    Terceiro Allariz Debuxado

    A terceira edición de Allariz Debuxado, Festival da Arte da Ilustración, decorrerá nesta vila ourensá na última fin de semana de xaneiro.

    A primeira parte do festival decorrerá no Fogar dos Maiores. Así, o venres 25 de xaneiro, ás 12:30, será o momento da presentacion das xornadas, a cargo de César Lorenzo, director de Aira Editorial. O programa comezará, ás 13:00, cunha charla a cargo de Javier Olivares, títulada «Intermundos. Crónicas de mil viaxes entre a historieta e a ilustración». Pola tarde, ás 17:00, a primeira conferencia será de Miguel Ángel Giner Bou, «Guión e narrativa gráfica: claves para contar unha historia»; ás 19:00 darase paso a outra disertación, de Cristina Durán e o propio Giner Bou, baixo o título «O cómic como ferramenta de transformación social».

    Pola noite, ás 23:30, o espectáculo de música e humor Branca & Tinta terá como escenario o Café Cultural Roi Xordo.

    O sábado ás 12:00 abrirase a II Feira da Creación —definida como «feira de ilustración, deseño, edición e outras creatividades»—, que se poderá visitar durante todo o día no Espazo BenComún. O programa da feira incluirá micropresentacións de proxectos (ata o día 18 de xaneiro está aínda aberto o prazo de inscrición de participantes nesas micropresentacións; máis información, nesta ligazón), e ás 13:00 a presentación do proxecto Nimales a cargo de Miki Pluviam.

    Pola tarde, no Fogar dos Maiores ás 17:00, os editores de Kalandraka Manuela Rodríguez e Xosé Ballesteros impartirán unha charla acerca da historia do Premio Internacional Compostela de Álbum Ilustrado.

    Como actividade complementaria, o festival contará coa exposición «11 anos de Premio Internacional Compostela de Álbum Ilustrado», na Galería Circular.

    Cartel a cargo de Miguel Robledo
    Cartel a cargo de Miguel Robledo

  • Ana Penyas, Premio Nacional do Cómic 2018

    Ana Penyas, Premio Nacional do Cómic 2018

    Onte deuse a coñecer a gañadora do Premio Nacional do Cómic correspondente a 2018: Ana Penyas, pola novela gráfica Estamos todas bien. O xurado elixiu esta obra por «rescatar, a partir dunha historia familiar, a voz dunha xeración silenciada; pola innovación e a frescura da posta en escena gráfica, ademais da habilidade para integrar recursos da banda deseñada e doutros medios». O galardón, que concede anualmente o Ministerio de Educación, Cultura e Deporte, está dotado con 20 000 euros e ten como obxecto «distinguir a mellor obra desta especialidade publicada en calquera das linguas do Estado» durante o ano anterior.

    Ana Penyas (Valencia, 1987) é diplomada en Deseño Industrial e graduada en Belas Artes na Universitat Politècnica de València. Foi seleccionada para realizar unha residencia artística en De Liceiras 18 (Porto, 2015). Recibiu unha mención especial na sexta edición de Iberoamérica Ilustra e gañou a edición seguinte. Ten publicado con editoriais como Mil Razones e Libros del K. O., e con revistas como MipetitMadrid.com, elHype.com, Bostezo e Pikara Magazine. A obra premiada, Estamos todas bien, é a súa primeira novela gráfica e obtivo en 2017 o premio FNAC/Salamandra Graphic; pola mesma obra foi tamén galardoada como autora revelación no Salón do Cómic de Barcelona.

    O xurado estivo presidido por Begoña Cerro Prada, subdirectora xeral de Promoción do Libro, a Lectura e as Letras Españolas, e actuaron como vogais Manuel Barrero (pola Asociación de Autores de Cómic de España), Ana Oncina (pola FADIP), Rocío Orraca (pola Confederación Española de Gremios y Asociaciones de Libreros); Tereixa Constenla (pola Asociación de Críticos y Divulgadores de Cómic de España), Josefina Molina (pola Real Academia de Bellas Artes de San Fernando), Pilar Martín (pola Federación de Asociaciones de Periodistas de España), Yanna Gutiérrez Franco (polo Instituto de Investigaciones Feministas da Universidad Complutense de Madrid), Miguel Gallardo (a proposta do ministro de Cultura), e os dous últimos autores galardoados, Rayco Pulido e Pablo Auladell.

  • O Encontro Galego de Ilustración chega ás 15 edicións

    O Encontro Galego de Ilustración chega ás 15 edicións

    Este ano, o Encontro Galego de Ilustración, que organiza anualmente a AGPI, alcanza a súa edición número 15, e ofrece máis contidos e actividades de interese tanto para profesionais como para o público xeral. O groso das actividades decorrerá na Unitaria (o venres 28) e no Auditorio de Galicia (o sábado 29).

    Convidados de relevancia internacional

    Os convidados principais deste ano son tres nomes de grande relevancia dentro do panorama actual da ilustración: Ana Galvañ, Juan Díaz-Faes e Miguel Gallardo.

    Ana Galvañ, murciana afincada en Madrid, ten realizado traballos de ilustración e cartelería para empresas e institucións como Lonely Planet, Unicef ou Matadero Madrid. É unha das autoras de cómics máis interesantes e innovadoras da actualidade, e o seu libro Pulse enter para continuar está a piques de publicarse no mercado estadounidense da man da prestixiosa editora Fantagraphics.

    O asturiano Juan Díaz-Faes é un ilustrador multidisciplinar, especializado en deseño de estampados téxtiles e ilustración de produto. Colabora en revistas como Yorokobu ou Ling e ten traballado para marcas como Vodafone ou Ikea. É coautor de varios libros, como Treinteenagers, con Carlos G. Miranda (Lunwerg), ou Cien pelis para ver y darle al coco, con Borja Crespo (Yorokubu).

    Pola súa parte, a longa traxectoria do catalán Miguel Gallardo está ligada nos seus comezos á lendaria revista El Víbora, na que creou personaxes tan icónicos como Makoki ou El Niñato. Despois ten acadado unha sólida traxectoria internacional como ilustrador editorial, colaborando con medios como New Yorker ou Herald Tribune (que lle teñen valido dous premios da Society of Newspaper Design). En 2007 publicou a novela gráfica María y yo, que narra as súas experiencias coa súa filla con autismo. O libro, de grande éxito, foi adaptado posteriormente ao cinema, e en 2015 tivo unha continuación, María cumple 20 años.

    Un programa atractivo

    O venres 28 a Unitaria (Calzada de San Pedro, s/n, 15703 Santiago de Compostela) acolle dúas actividades: un obradoiro de ilustración a cargo de Miguel Gallardo —co irónico título de «Eu non sei debuxar»— e unha nova sesión da Ilustranoite, formato en que unha decena de ilustradores e ilustradoras de Galicia presentarán os seus proxectos de xeito áxil, ameno e moi visual. Participarán nesta ocasión Maru Astray, Víctor Boullón, Nuria Díaz, Tomás Guerrero, Komorebi, María Lapido, Miss Hope, Ness, Venditti e Dani Xove.

    O sábado 29, pola mañá e e pola tarde no Auditorio de Galicia (Av. do Burgo das Nacións, s/n, 15704 Santiago de Compostela), e coa ilustradora Laura Pato (Le Petit Patito) como mestra de cerimonias, terán lugar as charlas de Galvañ, Díaz-Faes e Gallardo. Ademais, haberá un panel de experiencias en que os galegos Pilar Marcó, Xurxo G. Penalta e David Pazos falarán da súa visión como ilustradores para a industria téxtil galega.

    Xa pola noite, nun local da cidade vella de Santiago que se revelará o propio sábado, está organizada unha Festa fin de Encontro cunha Sesión DJ ilustrada; contará con música a cargo do DJ Bluemouse e proxeccións de debuxos realizado en directo por Dani Xove, Manel Cráneo e Alberto Guitián, entre outros.

    Todas as actividades son de entrada libre e gratuíta, agás o obradoiro, que precisa dunha inscrición previa de 15 euros (5 euros no caso dos socios da AGPI). Toda a información pode consultarse aquí.

    O Encontro conta coa colaboración do Concello de Santiago de Compostela, que cede a sala do Auditorio de Galicia, e co apoio económico da Consellería de Cultura, Educación e Ordenación Universitaria da Xunta de Galicia.

    15 edicións do Encontro

    Desde 2004, o Encontro Galego de Ilustración trae a Galicia ilustradores e ilustradoras de primeiro nivel internacional, sen esquecer os grandes nomes da ilustración galega.

    Esta cita dá cabida a todas as áreas existentes dentro da profesión, desde o mundo editorial ata o da animación, pasando pola publicidade ou os medios dixitais. Polo Encontro teñen pasado autores do talle de Ajubel, Algarabía Animación, Horacio Altuna, Arnal Ballester, Xosé Cobas, Suso Cubeiro, Luís Davila, Cristina Durán, Manel Fontdevila, Forges, Sagar Forniés, Giovanna Lopalco, Xan López Domínguez, Mar Malota, Xaquín Marín, Ignacio F. Maroto (Bambinomonkey), Max, Elena Odriozola, Carlos Ortín, Puño, Raúl, Julián Romero, David Rubín, Siro, Alberto Taracido, María Luisa Torcida, Alberto Vázquez ou Xosé Vizoso.

    O Encontro ten tratado, ademais, temas clave para a profesión como os dereitos de autor, a situación económica do sector, os cambios nos modelos de negocio ou o impacto das novas tecnoloxías. Temas debatidos e analizados por especialistas procedentes de organizacións e ámbitos moi diversos: axencias de ilustración, avogados, entidades de xestión, editoriais, asociacións sectoriais…

    Catorce anos despois, a ilustración está moito máis normalizada na nosa paisaxe cultural. O Encontro busca agora dar un paso adiante como cita pioneira en Galicia para os profesionais e os amantes da ilustración gráfica.

  • Múltiples citas de ilustración na Coruña

    Múltiples citas de ilustración na Coruña

    Desde o 1 de agosto desenvólvese na Coruña a Feira do Libro, que acolle moi diversas actividades e presentacións. Presentaron xa as súas novidades os nosos socios Dani Padrón, Xosé Tomás e Alberto Vázquez; a partir de hoxe fan o mesmo ilustradores como Fausto ou Miguelanxo Prado.  Mañá, sábado 4, a partir das 12:00, terá lugar na feira a 2.ª Brincadeira de ilustradoras e ilustradores, que, coordinada por David Pintor, contará coa presenza de Miguel Calatayud, Mariona Cabassa, Noemí Villamuza, Xan López Domínguez, Marc Taeger, Gustavo Roldán Devetach, Lucía Cobo, María Luisa Torcida, Xosé Cobas e María Lires, que participarán ás 18:00 nun debate conxunto. O venres 10 ás 18:00, a nosa socia Paula Mayor prepara a actividade «Collage da Coruña», relacionada co seu libro Coloreando A Coruña. Ao longo de toda a feira asinarán libros ademais os nosos socios Siro, Antonio Seijas e Óscar Villán.

    Ademais, o luns, día 6, comeza tamén a nova edición do festival da banda deseñada Viñetas desde o Atlántico, e á presenza de autores convidados coas súas respectivas exposicións súmanse tamén varias mostras complementarias organizadas por outras entidades. Así, na Galería Monty4 podemos encontrar a titulada Comix Revolution, do noso socio David Rubín, tamén protagonista, xunto con David Aja, da exposición Superpoderes, que ocupa a sede coruñesa de Afundación. No MAC (Museo de Arte Cotemporáneo), pola súa parte, exponse Historietas del tebeo, 1917-1977, que percorre a historia do cómic español baixo o comisariado de Antoni Guiral.

    Ademais, na próxima fin de semana comeza a nova edición do festival de autoedición e BD de autor Autobán, que se desenvolverá o venres 10 na Nave 1839 e o sábado 11 en diversos locais da rúa Orzán e que incluirá unha presentación de proxectos (o «Autobombo»), un Combate de debuxantes, unha feira de fanzines, charlas e mais un taller infantil.

  • Presenza galega no Concurso de Cómic da Biblioteca Insular de Gran Canaria

    Presenza galega no Concurso de Cómic da Biblioteca Insular de Gran Canaria

    A obra titulada Viento de levante, de Alejandro Galindo Buitrago, obtivo o primeiro premio —dotado con 3000 euros—, na primeira edición do Concurso Nacional de Cómic Biblioteca Insular de Gran Canaria. O xurado do concurso tamén outorgou un segundo premio, de 1500 euros, a La señora Rosa, de Elisa Riera, e un terceiro, de 1000 euros, a Nunca, de Francisco Bilbao e Mayte Gómez. Ademais, foron outorgados nove accésit dotados con 400 euros cada un; nos accésit houbo unha destacada presenza galega, con dous socios da AGPI entre eles: Michel Casado por Hotter tan the Hindenburg; Iago Araújo por Unamunos; Alicia Jaraba por Calcetines; Mayte Alvarado por El barco; Eduardo González por El Mercedes negro; Blanca Santamaría por El semáforo; Laura Pérez por Juega; Arnau Sanz por Selva Negra; e Javier Rodríguez por Working holidays.

    A editorial vasca Astiberri, coorganizadora do certame, publicará as obras gañadoras nun volume conxunto. O xurado desta edición estuvo presidido por Carlos García, e integrado polo editor Fernando Tarancón, os autores Rayco Pulido e Mamen Moreu e a xornalista especializada Tereixa Constenla.

    Á primera edición do Concurso de Cómic Biblioteca Insular de Gran Canaria presentáronse fundamentalmente autores e autoras españolas; Canarias foi a comunidade que máis obras rexistrou, cun un total de 72; seguidamente foron Galicia, cun total de 49, e Madrid, con 39, as seguintes comunidades que más títulos presentaron a esta convocatoria.