AGPI – Asociación Galega de Profesionais da Ilustración

Categoría: libros

  • ‘El día 3’, Premio Nacional do Cómic 2019

    ‘El día 3’, Premio Nacional do Cómic 2019

    O Premio Nacional do Cómic foi outorgado onte a Cristina Durán, Miguel Ángel Giner Bou e Laura Ballester pola súa novela gráfica El día 3. O xurado escolleu esta obra «por saber realizar desde o respecto a crónica dun drama social, cunha narrativa en que se equilibran a emoción, a excelencia gráfica e o uso de potentes metáforas visuais». O premio, concedido polo Ministerio de Cultura e Deporte, está dotado con 20 000 euros e ten como obxecto «distinguir a mellor obra desta especialidade publicada en calquera das linguas do Estado durante o ano 2018».

    Para a realización da novela gráfica galardoada, os autores baseáronse nas investigacións de Laura Ballester, reflectidas no libro Luchando contra el olvido, el largo camino de las víctimas del metro de Valencia (2015); o proxecto da novela gráfica gañou no seu momento, en 2016, o Premio Ciutat de Palma de Còmic, e publicouse en 2018.

    Cristina Durán (Valencia, 1970) é licenciada pola Facultade de Belas Artes de Valencia. Como debuxante de BD ten publicado, xunto ao guionista Giner Bou, Una posibilidad entre mil (2009), La máquina de Efrén (2012) —recompilados ambos en 2017 nun volume integral co título de Una posibilidad— e Cuando no sabes qué decir (2015). Ten recibido varios galardóns, como o premio Turia, o Premi Dones Progressistes ou o accésit do trofeo Les BDs qui font la différence. Foi presidenta da Associació de Professionals de la Il·lustració Valenciana (APIV) e membro das directivas de FADIP e o EIF. Actualmente forma parte de AC (Colectivo de Autoras de Cómic).

    Miguel Ángel Giner Bou (Benetússer, Valencia, 1969) é licenciado pola Facultade de Belas Artes de Valencia. É profesor de guión e narrativa no Máster de Deseño e Ilustración da Facultade de Belas Artes de Valencia e na ESAT (Escuela Superior de Arte y Tecnología), e traballa como ilustrador. Foi presidente da APIV e actualmente preside ARGH!, a Asociación Profesional de Guionistas de Cómic.

    Laura Ballester é licenciada en Ciencias da Información, e fixo desde 2006 un seguimento exhaustivo do accidente do metro de Valencia, un traballo polo que recibiu o Premio do Ateneu Cultural de Torrent en 2012, o premio da Cartelera Turia á mellor contribución xornalística en 2014 ou o premio Libertad de Expresión 2016 da Asociación de Vecinos de Patraix. Ten traballado en El Punt, en medios de comunicación locais de radio e televisión, e na cooperativa Paleta d’Ocres.

    O xurado, presidido pola subdirectora xeral de Promoción do Libro, Begoña Cerro Prada, tivo como vogais a Ulises Ponce López, pola Asociación de Autores de Cómic de España (AACE); Asier Iturralde, pola FADIP; Gonzalo González Verdoy, pola Confederación Española de Gremios y Asociaciones de Libreros (CEGAL); Elena Masarah Revuelta, pola Asociación de Críticos y Divulgadores de Cómic de España; Jordi Teixidor, pola Real Academia de Bellas Artes de San Fernando; Berta Tapia Zamora, pola Federación de Asociaciones de Periodistas de España (FAPE); Graciela Padilla Castillo, polo Instituto de Investigaciones Feministas da Universidad Complutense de Madrid; e mais a autora galardoada na convocatoria de 2018, Ana Penyas.

  • Ilustración na Feira do Libro da Coruña

    Ilustración na Feira do Libro da Coruña

    Na Feira do Libro da Coruña, que se desenvolve entre o 1 e o 11 de agosto, haberá lugar para a ilustración observada desde moi diferentes perspectivas.

    Naturalmente, o programa acolle varias presentacións de libros ilustrados e cómics. É o caso de Quokka Moka, de María Solar, que contará coa presenza do seu ilustrador, Víctor Rivas (día 1, ás 19:00); El increíble viaje de los besos voladores, de Inés Cuadrado e Aldara Prado (día 4, 18:00); Pelo de nube, de Dani Viéitez e Iria Iglesias (día 8, ás 18:00); Sementes viaxeiras, de Yolanda Castaño e Xosé Tomás (día 8, ás 19:00); Aprende banda deseñada con Fiz, de Kiko da Silva (día 10, 19:45); ou a versión galega de Pinturas de guerra, de Ángel de la Calle (día 11, ás 19:45). Ademais será tamén a presentación de O soño da serpe, primeira incursión do ilustrador Antonio Seijas como novelista (día 2, 19:45).

    Haberá sesións de sinaturas de libros, como as da colección «Coloreando» da ilustradora Paula Mayor (Coloreando A Coruña, Coloreando Santiago de Compostela e Coloreando a provincia de Lugo), o día 7 ás 19:30 (posto de Hércules Ediciones) e o 11 ás 12:00 (posto de Fnac).

    Tamén haberá outras actividades relacionadas coa ilustración: a titulada «Os ilustradores teñen superpoderes», con Rocío Bonilla (día 3, ás 18:00); o obradoiro de ilustración impartido por Xosé Tomás (día 6, ás 18:00); e o obradoiro «Entre el cómic y la novela gráfica», con Ana Merino (día 11, ás 19:45).

    Ás actividades da Feira do Libro sumaranse as da Rúa da BD do festival Viñetas desde o Atlántico, que comeza o próximo luns día 5, e na que a AGPI terá un posto ofrecendo publicacións propias e dos seus socios.

  • Ilustración no Culturgal 2018

    Ilustración no Culturgal 2018

    Esta fin de semana decorre no Pazo da Cultura de Pontevedra a nova edición de Culturgal, a Feira das Industrias Culturais. Nela darase cita unha boa representación de moi diversos sectores culturais, con presentacións, mesas redondas, actuacións, proxeccións e talleres para todo tipo de públicos. Entre toda a oferta de actividades culturais non podían faltar, naturalmente, as relacionadas coa ilustración.

    Así, por exemplo, mañá venres, ás 20:30 haberá o contacontos e obradorio de monicreques Lola e as 21 vacas (Triqueta Verde), coa ilustradora Blanca Millán.

    O sábado, ás 12:00, presentarase o novo libro de Bieito Iglesias, Guías caninos, coa presenza do seu ilustrador, Xulio Gayoso. Á mesma hora, Bea Lema conducirá un obradoiro de banda deseñada, que terá continuación ás 17:00 e ás 18:30. Ás 12:30, presentarase o novo volume da colección «Mulleres Bravas da nosa historia», Pepa, a loba, escrito por Ledicia Costas, e o acto contará coa súa ilustradora, Eva Agra. Ás 13:00 haberá espazo para a presentación «Deica! Creacións. 5 anos ilustrando o país», con Iria Ribadomar. Xa ás 17:30, presentarase a revista de banda deseñada A Viñeta de Schrödinger, editada pola Mesa pola Normalización Lingüística. A partir das 18:15 haberá unha sesión de contacontos e pintura, «Roger, o rato e o misterio das manchas» (Triqueta Verde) con David Lorenzo. Ás 19:00 será o momento da presentación do volume O puño e a letra. Antoloxía do cómic poético, que inclúe versións en cómic a cargo de 40 autores sobre poemas de Yolanda Castaño. En diferentes espazos da feira, ás 19:45 presentaranse os libros Anónimas, retratos de musas cotiás, coa ilustradora Gemma Marqués, e Don Ferretín Ferretón e o seu cadelo lambón coa ilustradora Aurora Cascudo Román.

    Xa o domingo, ás 13:00 terá lugar na feira a presentación do libro infantil O tempo meteorolóxico, co seu autor, Miguel Robledo. Finalmente, ás 13:30 poderase asistir á presentación do álbum ilustrado Puff! Vaia peido, con Luisa Martínez Lorenzo.

    O programa completo en PDF pode descargarse desde a web do festival.

    Cartel do Culturgal 2018, obra de Pepe Barro

  • Múltiples citas de ilustración na Coruña

    Múltiples citas de ilustración na Coruña

    Desde o 1 de agosto desenvólvese na Coruña a Feira do Libro, que acolle moi diversas actividades e presentacións. Presentaron xa as súas novidades os nosos socios Dani Padrón, Xosé Tomás e Alberto Vázquez; a partir de hoxe fan o mesmo ilustradores como Fausto ou Miguelanxo Prado.  Mañá, sábado 4, a partir das 12:00, terá lugar na feira a 2.ª Brincadeira de ilustradoras e ilustradores, que, coordinada por David Pintor, contará coa presenza de Miguel Calatayud, Mariona Cabassa, Noemí Villamuza, Xan López Domínguez, Marc Taeger, Gustavo Roldán Devetach, Lucía Cobo, María Luisa Torcida, Xosé Cobas e María Lires, que participarán ás 18:00 nun debate conxunto. O venres 10 ás 18:00, a nosa socia Paula Mayor prepara a actividade «Collage da Coruña», relacionada co seu libro Coloreando A Coruña. Ao longo de toda a feira asinarán libros ademais os nosos socios Siro, Antonio Seijas e Óscar Villán.

    Ademais, o luns, día 6, comeza tamén a nova edición do festival da banda deseñada Viñetas desde o Atlántico, e á presenza de autores convidados coas súas respectivas exposicións súmanse tamén varias mostras complementarias organizadas por outras entidades. Así, na Galería Monty4 podemos encontrar a titulada Comix Revolution, do noso socio David Rubín, tamén protagonista, xunto con David Aja, da exposición Superpoderes, que ocupa a sede coruñesa de Afundación. No MAC (Museo de Arte Cotemporáneo), pola súa parte, exponse Historietas del tebeo, 1917-1977, que percorre a historia do cómic español baixo o comisariado de Antoni Guiral.

    Ademais, na próxima fin de semana comeza a nova edición do festival de autoedición e BD de autor Autobán, que se desenvolverá o venres 10 na Nave 1839 e o sábado 11 en diversos locais da rúa Orzán e que incluirá unha presentación de proxectos (o «Autobombo»), un Combate de debuxantes, unha feira de fanzines, charlas e mais un taller infantil.

  • Ilustración na Gala do Libro Galego

    Ilustración na Gala do Libro Galego

    O pasado sábado, 19 de maio, tivo lugar no Teatro Principal de Santiago de Compostela a terceira edición dos Premios Gala do Libro Galego, organizados conxuntamente pola Asociación de Escritores e Escritoras en Lingua Galega (AELG), a Asociación Galega de Editoras (AGE) e mais a Federación de Librarías de Galicia (FLG). Entre as obras gañadoras (escollidas entre todas as editadas ao longo de 2017), houbo varias relacionadas coa ilustración.

    Así, na categoría Infantil resultou premiado A señorita Bubble, de Ledicia Costas, ilustrado polo noso socio Andrés Meixide. Na categoría Libro ilustrado, o premio foi para Tinta de luz, con textos de Xosé María Álvarez Cáccamo ilustrados pola artista visual Berta Cáccamo. Pola súa parte, na categoría Libro de banda deseñada, Alter-Nativo, de Jorge Campos, foi a obra galardoada. Finalmente, a categoría de Tradución premiou a versión de David A. Álvarez de Pippi Mediaslongas, de Astrid Lindgren, que inclúe as ilustracións orixinais de Ingrid Vang Nyman.

    Polo que respecta ao capítulo de Premios ás traxectorias, o galardón á Iniciativa cultural ou de fomento da lectura foi para o festival de banda deseñada Viñetas desde o Atlántico.

    O xurado dos premios estivo formado por María Luz Corral, Mario Regueira, Marga do Val, o noso socio Óscar Villán, Susana Sánchez Aríns, Xavier Senín e Óscar Antón Pérez García.

  • Presenza galega no Concurso de Cómic da Biblioteca Insular de Gran Canaria

    Presenza galega no Concurso de Cómic da Biblioteca Insular de Gran Canaria

    A obra titulada Viento de levante, de Alejandro Galindo Buitrago, obtivo o primeiro premio —dotado con 3000 euros—, na primeira edición do Concurso Nacional de Cómic Biblioteca Insular de Gran Canaria. O xurado do concurso tamén outorgou un segundo premio, de 1500 euros, a La señora Rosa, de Elisa Riera, e un terceiro, de 1000 euros, a Nunca, de Francisco Bilbao e Mayte Gómez. Ademais, foron outorgados nove accésit dotados con 400 euros cada un; nos accésit houbo unha destacada presenza galega, con dous socios da AGPI entre eles: Michel Casado por Hotter tan the Hindenburg; Iago Araújo por Unamunos; Alicia Jaraba por Calcetines; Mayte Alvarado por El barco; Eduardo González por El Mercedes negro; Blanca Santamaría por El semáforo; Laura Pérez por Juega; Arnau Sanz por Selva Negra; e Javier Rodríguez por Working holidays.

    A editorial vasca Astiberri, coorganizadora do certame, publicará as obras gañadoras nun volume conxunto. O xurado desta edición estuvo presidido por Carlos García, e integrado polo editor Fernando Tarancón, os autores Rayco Pulido e Mamen Moreu e a xornalista especializada Tereixa Constenla.

    Á primera edición do Concurso de Cómic Biblioteca Insular de Gran Canaria presentáronse fundamentalmente autores e autoras españolas; Canarias foi a comunidade que máis obras rexistrou, cun un total de 72; seguidamente foron Galicia, cun total de 49, e Madrid, con 39, as seguintes comunidades que más títulos presentaron a esta convocatoria.

     

  • Exposición ‘Ilustrando Galicia. 2016-2017’

    Exposición ‘Ilustrando Galicia. 2016-2017’

    Ata o próximo 3 de xuño pode visitarse na Coruña a exposición Ilustrando Galicia. 2016-2017. A mostra pretende achegar a realidade máis recente da ilustración de libros no país, e para iso reúne a obra gráfica de 23 artistas, entre eles moitos socios da AGPI: Dani Padrón, Andrés Meixide, Marina Seoane, Óscar Villán, Nuria Díaz, Xan López Domínguez, Xosé Cobas, María Lires, Manuel Uhía, Jacobo Fernández Serrano, Rodrigo Chao, Antonio Seijas, David Pintor, Marcos Viso, Lucía Cobo, Víctor Rivas, María Brenn, Marc Taeger, Ánxeles Ferrer, Ignacio Hernández, Olaya Naveira Souto, Ana Pedreira e Luz Beloso.

    Para facer a selección de obras, atendeuse aos libros editados nos anos 2016 e 2017 e seleccionáronse 23 artistas galegos ou establecidos en Galicia, que tivesen obra publicada nese período, e que se tratase de primeiras edicións. Así, na exposición poden verse ilustracións pertencentes a libros dirixidos ao público infantil, texto narrativo e poético, álbums ilustrados de gran formato e libros-disco.

    A mostra está aberta na Casa de Cultura Salvador de Madariaga (rúa Durán Loriga, 10, 15003 A Coruña), recinto municipal especializado na exhibición de ilustración e banda deseñada.