Do 19 ó 23 de outubro no Pavillón 4.1 The Arts + A Federación de Asociacións de Ilustradores/as Profesionais de España en colaboración co Ministerio de Cultura e Deporte e a Feira Internacional do Libro de Francfort organiza unha exposición que albergará obra de sesenta autores/as de todo o territorio nacional. 30 persoas escollidas por convocatoria e outros 30 premios nacionais. Cada ilustrador ou ilustradora mostrarannos unha secuencia narrativa de dúas imaxes extraídas dun libro inédito ou xa publicado, contándonos unha pequena historia sen palabras. 60 historias mediante 120 ilustracións que representarán a ilustración española contemporánea. Convocatoria aberta do 20 de xullo ó 20 de agosto ás 23:59h. + info: www.fadip.org
Os nosos compañeiros da APIM (Asociación de Profesionales de la Ilustración de Madrid) puxeron en marcha durante a Feira do Libro do pasado mes de abril a campaña «Ilustradores en blanco», que ten como obxectivo principal denunciar a precariedade do mercado editorial. Pode lerse o manifesto aquí, e tamén poden verse imaxes das accións realizadas na súa conta de Instagram.
Desde a AGPI cremos que é importante unir forzas nesta dirección e sumámonos á campaña. Así pois, estamos a organizar unha queda, coordinada coas outras asociacións de ilustradores, este sábado 21 en librarías do centro de distintas cidades. Serán benvidos todos os ilustradores/as, así como todos os amantes e defensores da ilustración. Os asistentes, se é posible, levarán posto algo branco e repartirán marcapáxinas da campaña.
De momento temos confirmadas as quedas en Santiago e A Coruña. Para quen non poida asistir, pode colaborarse de diversas formas:
Descargando aquí o marcapáxinas de #ilustradoresenbranco e imprimindo algúns exemplares.
Indo a librarías próximas, coñecidas, explicando a campaña, e pregúntadolles se se poden deixar marcapáxinas ao dispor dos clientes ou dentro dalgúns libros.
Facendo seguimento do que se está a facer e subíndoo a redes (unha foto co libreiro ou libreira que acepta colaborar na campaña, unha foto poñendo os marcapáxinas etcétera).
Póndolle os cancelos #ilustradoresenblanco e #ilustradoresenbranco a ao que se suba ás redes, etiquetándonos.
En breve confirmaremos as datas e lugares das quedas.
Onte deuse a coñecer o gañador do Premio Nacional de Ilustración correspondente a 2019, Paco Giménez. En palabras do xurado, o recoñecemento ao ilustrador vén motivado «por manter a calidade e a frescura ao longo dunha traxectoria de máis de corenta anos cun estilo característico; pola súa lealdade á liña e á xeometría asimilada dalgunhas das vangardas históricas das artes visuais, impulsando así a profesión e a ilustración infantil e xuvenil». O premio está concedido polo Ministerio de Cultura e Deporte, «co obxectivo de recoñecer e distinguir o conxunto do labor realizado por unha ilustradora ou ilustrador español no ámbito do libro e das letras en calquera das linguas españolas», e conta cunha dotación económica de 20 000 euros.
Paco Giménez (Valencia, 1954) iniciou o seu labor profesional como ilustrador e deseñador gráfico en 1974, e desde 1982 o seu traballo céntrase principalmente no sector infantil e xuvenil. Habitualmente forma tándem co escritor Carles Cano. Ademais de banda deseñada, ten ilustrado individualmente máis de 125 libros e materiais didácticos. Entre os outros galardóns que ten obtido encóntrase o Premio Lazarillo (1989), o Premi al llibre en valencià millor il·lustat (2002) e a selección ‘White Raven’ (1996). Ten participado en innumerables exposicións internacionais, como as da Bienal de Bratislava, a Feira de Boloña, o Institut International Charles Perrault ou o MUVIM de Valencia. Ten sido cofundador, presidente e vicepresidente da Associació de Professionals de la Il·lustració Valenciana (APIV) e cofundador e secretario da FADIP.
O Premio Nacional do Cómic foi outorgado onte a Cristina Durán,Miguel Ángel Giner Bou e Laura Ballester pola súa novela gráfica El día 3. O xurado escolleu esta obra «por saber realizar desde o respecto a crónica dun drama social, cunha narrativa en que se equilibran a emoción, a excelencia gráfica e o uso de potentes metáforas visuais». O premio, concedido polo Ministerio de Cultura e Deporte, está dotado con 20 000 euros e ten como obxecto «distinguir a mellor obra desta especialidade publicada en calquera das linguas do Estado durante o ano 2018».
Para a realización da novela gráfica galardoada, os autores baseáronse nas investigacións de Laura Ballester, reflectidas no libro Luchando contra el olvido, el largo camino de las víctimas del metro de Valencia (2015); o proxecto da novela gráfica gañou no seu momento, en 2016, o Premio Ciutat de Palma de Còmic, e publicouse en 2018.
Cristina Durán (Valencia, 1970) é licenciada pola Facultade de Belas Artes de Valencia. Como debuxante de BD ten publicado, xunto ao guionista Giner Bou, Una posibilidad entre mil (2009), La máquina de Efrén (2012) —recompilados ambos en 2017 nun volume integral co título de Una posibilidad— e Cuando no sabes qué decir (2015). Ten recibido varios galardóns, como o premio Turia, o Premi Dones Progressistes ou o accésit do trofeo Les BDs qui font la différence. Foi presidenta da Associació de Professionals de la Il·lustració Valenciana (APIV) e membro das directivas de FADIP e o EIF. Actualmente forma parte de AC (Colectivo de Autoras de Cómic).
Miguel Ángel Giner Bou (Benetússer, Valencia, 1969) é licenciado pola Facultade de Belas Artes de Valencia. É profesor de guión e narrativa no Máster de Deseño e Ilustración da Facultade de Belas Artes de Valencia e na ESAT (Escuela Superior de Arte y Tecnología), e traballa como ilustrador. Foi presidente da APIV e actualmente preside ARGH!, a Asociación Profesional de Guionistas de Cómic.
Laura Ballester é licenciada en Ciencias da Información, e fixo desde 2006 un seguimento exhaustivo do accidente do metro de Valencia, un traballo polo que recibiu o Premio do Ateneu Cultural de Torrent en 2012, o premio da Cartelera Turia á mellor contribución xornalística en 2014 ou o premio Libertad de Expresión 2016 da Asociación de Vecinos de Patraix. Ten traballado en El Punt, en medios de comunicación locais de radio e televisión, e na cooperativa Paleta d’Ocres.
O xurado, presidido pola subdirectora xeral de Promoción do Libro, Begoña Cerro Prada, tivo como vogais a Ulises Ponce López, pola Asociación de Autores de Cómic de España (AACE); Asier Iturralde, pola FADIP;Gonzalo González Verdoy, pola Confederación Española de Gremios y Asociaciones de Libreros (CEGAL); Elena Masarah Revuelta, pola Asociación de Críticos y Divulgadores de Cómic de España; Jordi Teixidor, pola Real Academia de Bellas Artes de San Fernando; Berta Tapia Zamora, pola Federación de Asociaciones de Periodistas de España (FAPE); Graciela Padilla Castillo, polo Instituto de Investigaciones Feministas da Universidad Complutense de Madrid; e mais a autora galardoada na convocatoria de 2018, Ana Penyas.
Dentro do seu programa de colaboracións con Portugal, a AGPI presenta dentro do 12.º Encontro Internacional de Ilustração de São João da Madeira, nesa localidade lusa próxima á cidade do Porto, unha mostra de vinte e cinco ilustracións doutros tantos ilustradores e ilustradoras membros da asociación.
Onte deuse a coñecer a gañadora do Premio Nacional do Cómic correspondente a 2018: Ana Penyas, pola novela gráfica Estamos todas bien. O xurado elixiu esta obra por «rescatar, a partir dunha historia familiar, a voz dunha xeración silenciada; pola innovación e a frescura da posta en escena gráfica, ademais da habilidade para integrar recursos da banda deseñada e doutros medios». O galardón, que concede anualmente o Ministerio de Educación, Cultura e Deporte, está dotado con 20 000 euros e ten como obxecto «distinguir a mellor obra desta especialidade publicada en calquera das linguas do Estado» durante o ano anterior.
Ana Penyas (Valencia, 1987) é diplomada en Deseño Industrial e graduada en Belas Artes na Universitat Politècnica de València. Foi seleccionada para realizar unha residencia artística en De Liceiras 18 (Porto, 2015). Recibiu unha mención especial na sexta edición de Iberoamérica Ilustra e gañou a edición seguinte. Ten publicado con editoriais como Mil Razones e Libros del K. O., e con revistas como MipetitMadrid.com, elHype.com, Bostezo e Pikara Magazine. A obra premiada, Estamos todas bien, é a súa primeira novela gráfica e obtivo en 2017 o premio FNAC/Salamandra Graphic; pola mesma obra foi tamén galardoada como autora revelación no Salón do Cómic de Barcelona.
O xurado estivo presidido por Begoña Cerro Prada, subdirectora xeral de Promoción do Libro, a Lectura e as Letras Españolas, e actuaron como vogais Manuel Barrero (pola Asociación de Autores de Cómic de España), Ana Oncina (pola FADIP), Rocío Orraca (pola Confederación Española de Gremios y Asociaciones de Libreros); Tereixa Constenla (pola Asociación de Críticos y Divulgadores de Cómic de España), Josefina Molina (pola Real Academia de Bellas Artes de San Fernando), Pilar Martín(pola Federación de Asociaciones de Periodistas de España), Yanna Gutiérrez Franco (polo Instituto de Investigaciones Feministas da Universidad Complutense de Madrid), Miguel Gallardo (a proposta do ministro de Cultura), e os dous últimos autores galardoados, Rayco Pulido e Pablo Auladell.
Onte fíxose público que a ilustradora Maria Rius é a galardoada co Premio Nacional de Ilustración correspondente a 2018. O premio concédeo de forma anual o Ministerio de Cultura e Deporte, co obxectivo de «recoñecer e distinguir o conxunto do labor realizado por un ilustrador español no ámbito do libro e das letras españolas», e conta cunha dotación económica de 20.000 euros.
O xurado escolleu a Rius «pola súa extensísima traxectoria, pola atemporalidade da súa obra, polo carácter sereno da súa ilustración, sempre en diálogo co texto e, finalmente, pola súa implicación co colectivo de ilustradores».
Nacida en 1938 en Sant Pere de Riudebitlles (Barcelona), estudou Debuxo e Escultura na Escola Superior de Belas Artes de Sant Jordi de Barcelona, e despois grafismo na Kunstwerkschule de Münster (Alemaña) e deseño na Kunstgeberweschule de Berna (Suíza). Foi fundadora e presidenta da Associació Professional d’Il·lustradors de Catalunya (APIC), e tamén cofundadora do Consell Català del Llibre Infantil i Juvenil. Ten colaborado con diversas revistas infantís, cabeceiras de xornais e editoriais, e conta na súa bibliografía con máis de 370 títulos, algúns dos cales teñen sido publicados nunha vintena de países. Entre os galardóns que ten merecido o seu traballo están o Premio Lazarillo de Ilustración (1968), o Premio CCEI (1971 e 1974), o Premio da Crítica Serra d’Or (1979 e 1981), o Premio de Ilustración da Generalitat de Catalunya (1983) e o Premio Junceda de Honor en 2008.
O xurado, presidido polo subdirector adxunto de Promoción do Libro, a Lectura e as Letras Españolas, David García Rivas, estivo composto por Sonia Pulido (proposta pola APIC), Núria Tamarit (pola APIV), Patricia Metola (pola APIM), Marta Álvarez (pola AGPI); Elisabeth Pérez (por Euskal Irudigileak), Violeta Lópiz (pola FADIP), Agurtzane Villate (pola OEPLI), Araceli Pereda Alonso (pola Real Academia de Bellas Artes de San Fernando); Amparo Serrano de Haro Soriano (polo Centro de Estudios de Género da UNED), Eva Vázquez Merino (designada polo ministro de Cultura e Deporte), e mais o premiado en 2016, Javier Sáez Castán.
A Asociación Profesional de Ilustradores de Madrid (APIM) fixo público esta semana o seu Decálogo de animación para no morir en el intento, unha serie de recomendacións para os e as profesionais da ilustración dedicados ao sector, que abrangue desde grandes produccións cinematográficas ata pequenas curtametraxes independentes, pasando por videoxogos, publicidade e televisión. En todos eses ámbitos traballa unha multitude de ilustradores a deseñar personaxes, debuxar fondos, facer layouts, crear concept art etc.
Desde APIM considérase moi necesario que «un sector tan grande como é a animación, e tan cheo de ilustradores e ilustradoras a traballar a un nivel excelente, comece a tomar conciencia de colectivo profesional». Así pois, o obxectivo deste decálogo é «contribuír a formular unha mudanza de paradigma no sector para sermos conscientes da nosa problemática e termos ferramentas ao noso alcance con que a combater».
Price It Right é unha campaña coordinada polo European Illustrators Forum (EIF) que pretende concienciar e apoiar os profesionais da ilustración e os seus clientes á hora de negociar o seu traballo e poñerlle prezo. Na campaña colaboran todas as asociacións membro —que representan arredor de 12.000 ilustradores e ilustradoras de toda Europa—, entre elas as que compoñen FADIP, como a AGPI.
A campaña busca ser beneficiosa tanto para ilustradores como para clientes. Presenta testemuños de profesionais recoñecidos do mundo da ilustración —como Mar Hernánez Malota,Xan López Domínguez ou a editora Marion Duc—, anima os ilustradores a compartiren nas redes sociais estas reflexións e as súas propias, dá algúns consellos e recursos para a negociación dos traballos de ilustración e propón participar nunha enquisa que servirá para valorar en toda Europa o estado da cuestión.
Price It Right, que se desenvolverá ata marzo de 2019, ten como precedente diversas campañas en contra do traballo gratuíto, que se dá moitas veces en forma de «traballo especulativo» na actualidade, e vai un paso más alá, buscando concienciar a todos os sectores implicados da necesidade de prezos xustos e negociacións transparentes, como garantía da propia perdurabilidade da actividade da ilustración. Pode accederse a todos os materiais da campaña en galego, incluída a enquisa, aquí. E tamén en castelán, nestoutra ligazón da FADIP.
A iniciativa Creative Fair Play, promovida polas entidades belgas do mundo do deseño Flanders DC e Creative Network, presenta un breve compendio de boas prácticas dirixidas ao sector creativo en todos os seus ámbitos, entre eles o da ilustración. Desde onte, a web suma ás súas versións en neerlandés, francés e inglés tamén unha en español, coa tradución proporcionada por FADIP.
AGPI e FADIP están así entre a vintena de organizacións internacionais que apoian esta iniciativa, que busca que exista «xogo limpo» no sector ao tratar con profesionais creativos independentes, propondo boas prácticas que involucren as dúas partes pero especialmente dirixidas a concienciar os empresarios da necesidade de ter en conta as condicións de traballo e os dereitos de autor, e de fuxir das prácticas especulativas e os falsos concursos, entre outras cuestións, nunha onda similar ao promovido pola AGPI desde a súa Guía Ninja do Ilustrador. As boas prácticas están presentadas de forma moi concisa e complementadas por ilustracións de Charlotte Dumortier. Ademais de na web, o compendio de boas prácticas pode lerse en formato PDF.
Calquera profesional da ilustración pode apoiar tamén a iniciativa incluíndo na súa páxina web o logotipo de Creative Fair Play, que se pode descargar libremente desde aquí.
