AGPI – Asociación Galega de Profesionais da Ilustración

Categoría: cómic

  • Viñetas desde o Atlántico 2019

    Viñetas desde o Atlántico 2019

    Entre o 5 e o 11 de agosto, a cidade da Coruña recibe unha nova edición —a vixésimo segunda— do festival da banda deseñada Viñetas desde o Atlántico. Este ano, o festival ten como autores convidados a Abel Alves, Yolanda Castaño (como figura central do libro colectivo de BD O puño e a letra, baseado en poemas seus), Jorge Coelho, Isabel Greenberg, Albert Monteys, Antonio Navarro, David Sala e Tony Sandoval. Ademais das mostras monográficas correspondentes a estes autores, o evento contará tamén coas exposicións «¡Mil rayos! Tesoros de un tintinófilo», de Pedro Rey; as pranchas da obra gañadora do Premio Castelao 2018, «Canción para afundir flores no mar», de Oliver Añón; e «¿Pintas o dibujas? Un paseo por el arte de la mano del cómic», que conta con obras de Ana Galvañ, Antonio Altarriba / Keko, Fermín Solís, Laura Pérez Vernetti, María Hesse, Mauro Entrialgo, Max, Pablo Auladell e Santiago García / Javier Olivares.

    Como é habitual, o programa ten numerosas charlas e conferencias, presentacións, talleres e sesións de sinaturas, e ademais conta cunha feira especializada en cómic, co nome de «Rúa da BD». Nela, como vén sendo tradicional, a AGPI ten unha caseta, onde poden adquirirse as publicacións da asociación e tamén materiais xerados polos socios: láminas, fanzines e outros produtos de ilustración aplicada. Poden encontrarse así materiais de Carlos Arrojo, Sonia Corral, Miguel Cuba, Estefanía Domínguez Cagigao, Xosé Geada Uzal, Paula Mayor, Jorge Peral ou Luis Sendón, entre outros.

    Cartel do Viñetas 2019, sobre ilustración de Belén Ortega
  • II Encontro de Banda Deseñada Histórica de Galicia

    II Encontro de Banda Deseñada Histórica de Galicia

    Esta mañá presentouse a segunda edición do Encontro de Banda Deseñada Histórica de Galicia, que se desenvolverá en Lugo os días 25 de abril e 4 e 5 de maio. O encontro inclúe actividades para os amantes da historia, do debuxo e do cómic; segundo os seus organizadores, «contribúe a poñer en valor a importancia desta disciplina artística e, especialmente, a calidade de profesionais galegos».

    Está organizado por Demo Editorial e polo portal web Historia de Galicia, e conta coa colaboración da AGPI, entre outras entidades. O programa inclúe entre as súas actividades charlas, unha clase maxistral de ilustración, un obradoiro de debuxo para nenos e un roteiro histórico.

    Hoxe, xoves 25 de abril, o Encontro comeza cunha clase maxistral sobre cor dixital, da man do ilustrador Javi Montes, que traballa como colorista para as principais editoriais de cómic dos mercados americano e franco-belga, como Marvel, DC, Dargaud ou Le Lombard. Será ás 17:00, na Escola de Arte Ramón Falcón.

    A fin de semana do 4 e 5 de maio, o programa continuará con sesións teóricas, conferencias e obradoiros prácticos sobre banda deseñada histórica. O sábado 4 de maio, ás 10:00, organízase unha ruta histórica polo Lugo romano coa especialista en historia Lidia de la Fuente. A partir das 11:00, no CENTRAD, haberá un obradoiro para nenos impartido por Víctor Boullón; nel poderán aprender as principais técnicas da ilustración histórica (as inscricións poden realizarse nesta web). Ás 13:00, os autores participantes no Encontro asinarán libros na Librería Tótem.

    Na tarde do sábado, a sala central do CENTRAD acollerá varias conferencias e mesas redondas. Miguel Fernández falará ás 17:30 sobre banda deseñada ambientada na Galicia medieval; Manel Craneo, ás 18:30, acerca da banda deseñada histórica en Galicia; e Javi Montes e José Barreiro disertarán ás 19:30 sobre a banda deseñada histórica no mercado europeo.

    Como remate desta programación, o 5 de maio, ás 12:00 na Sala Clavicémbalo, proxectaranse filmes de ficción e documentais sobre banda deseñada e haberá unha sesión de contacontos históricos da man do actor e contacontos Avelino González.

    Cartel do Encontro, a cargo de Manel Cráneo
  • Terceiro Allariz Debuxado

    Terceiro Allariz Debuxado

    A terceira edición de Allariz Debuxado, Festival da Arte da Ilustración, decorrerá nesta vila ourensá na última fin de semana de xaneiro.

    A primeira parte do festival decorrerá no Fogar dos Maiores. Así, o venres 25 de xaneiro, ás 12:30, será o momento da presentacion das xornadas, a cargo de César Lorenzo, director de Aira Editorial. O programa comezará, ás 13:00, cunha charla a cargo de Javier Olivares, títulada «Intermundos. Crónicas de mil viaxes entre a historieta e a ilustración». Pola tarde, ás 17:00, a primeira conferencia será de Miguel Ángel Giner Bou, «Guión e narrativa gráfica: claves para contar unha historia»; ás 19:00 darase paso a outra disertación, de Cristina Durán e o propio Giner Bou, baixo o título «O cómic como ferramenta de transformación social».

    Pola noite, ás 23:30, o espectáculo de música e humor Branca & Tinta terá como escenario o Café Cultural Roi Xordo.

    O sábado ás 12:00 abrirase a II Feira da Creación —definida como «feira de ilustración, deseño, edición e outras creatividades»—, que se poderá visitar durante todo o día no Espazo BenComún. O programa da feira incluirá micropresentacións de proxectos (ata o día 18 de xaneiro está aínda aberto o prazo de inscrición de participantes nesas micropresentacións; máis información, nesta ligazón), e ás 13:00 a presentación do proxecto Nimales a cargo de Miki Pluviam.

    Pola tarde, no Fogar dos Maiores ás 17:00, os editores de Kalandraka Manuela Rodríguez e Xosé Ballesteros impartirán unha charla acerca da historia do Premio Internacional Compostela de Álbum Ilustrado.

    Como actividade complementaria, o festival contará coa exposición «11 anos de Premio Internacional Compostela de Álbum Ilustrado», na Galería Circular.

    Cartel a cargo de Miguel Robledo
    Cartel a cargo de Miguel Robledo

  • Ilustración no Culturgal 2018

    Ilustración no Culturgal 2018

    Esta fin de semana decorre no Pazo da Cultura de Pontevedra a nova edición de Culturgal, a Feira das Industrias Culturais. Nela darase cita unha boa representación de moi diversos sectores culturais, con presentacións, mesas redondas, actuacións, proxeccións e talleres para todo tipo de públicos. Entre toda a oferta de actividades culturais non podían faltar, naturalmente, as relacionadas coa ilustración.

    Así, por exemplo, mañá venres, ás 20:30 haberá o contacontos e obradorio de monicreques Lola e as 21 vacas (Triqueta Verde), coa ilustradora Blanca Millán.

    O sábado, ás 12:00, presentarase o novo libro de Bieito Iglesias, Guías caninos, coa presenza do seu ilustrador, Xulio Gayoso. Á mesma hora, Bea Lema conducirá un obradoiro de banda deseñada, que terá continuación ás 17:00 e ás 18:30. Ás 12:30, presentarase o novo volume da colección «Mulleres Bravas da nosa historia», Pepa, a loba, escrito por Ledicia Costas, e o acto contará coa súa ilustradora, Eva Agra. Ás 13:00 haberá espazo para a presentación «Deica! Creacións. 5 anos ilustrando o país», con Iria Ribadomar. Xa ás 17:30, presentarase a revista de banda deseñada A Viñeta de Schrödinger, editada pola Mesa pola Normalización Lingüística. A partir das 18:15 haberá unha sesión de contacontos e pintura, «Roger, o rato e o misterio das manchas» (Triqueta Verde) con David Lorenzo. Ás 19:00 será o momento da presentación do volume O puño e a letra. Antoloxía do cómic poético, que inclúe versións en cómic a cargo de 40 autores sobre poemas de Yolanda Castaño. En diferentes espazos da feira, ás 19:45 presentaranse os libros Anónimas, retratos de musas cotiás, coa ilustradora Gemma Marqués, e Don Ferretín Ferretón e o seu cadelo lambón coa ilustradora Aurora Cascudo Román.

    Xa o domingo, ás 13:00 terá lugar na feira a presentación do libro infantil O tempo meteorolóxico, co seu autor, Miguel Robledo. Finalmente, ás 13:30 poderase asistir á presentación do álbum ilustrado Puff! Vaia peido, con Luisa Martínez Lorenzo.

    O programa completo en PDF pode descargarse desde a web do festival.

    Cartel do Culturgal 2018, obra de Pepe Barro

  • Ana Penyas, Premio Nacional do Cómic 2018

    Ana Penyas, Premio Nacional do Cómic 2018

    Onte deuse a coñecer a gañadora do Premio Nacional do Cómic correspondente a 2018: Ana Penyas, pola novela gráfica Estamos todas bien. O xurado elixiu esta obra por «rescatar, a partir dunha historia familiar, a voz dunha xeración silenciada; pola innovación e a frescura da posta en escena gráfica, ademais da habilidade para integrar recursos da banda deseñada e doutros medios». O galardón, que concede anualmente o Ministerio de Educación, Cultura e Deporte, está dotado con 20 000 euros e ten como obxecto «distinguir a mellor obra desta especialidade publicada en calquera das linguas do Estado» durante o ano anterior.

    Ana Penyas (Valencia, 1987) é diplomada en Deseño Industrial e graduada en Belas Artes na Universitat Politècnica de València. Foi seleccionada para realizar unha residencia artística en De Liceiras 18 (Porto, 2015). Recibiu unha mención especial na sexta edición de Iberoamérica Ilustra e gañou a edición seguinte. Ten publicado con editoriais como Mil Razones e Libros del K. O., e con revistas como MipetitMadrid.com, elHype.com, Bostezo e Pikara Magazine. A obra premiada, Estamos todas bien, é a súa primeira novela gráfica e obtivo en 2017 o premio FNAC/Salamandra Graphic; pola mesma obra foi tamén galardoada como autora revelación no Salón do Cómic de Barcelona.

    O xurado estivo presidido por Begoña Cerro Prada, subdirectora xeral de Promoción do Libro, a Lectura e as Letras Españolas, e actuaron como vogais Manuel Barrero (pola Asociación de Autores de Cómic de España), Ana Oncina (pola FADIP), Rocío Orraca (pola Confederación Española de Gremios y Asociaciones de Libreros); Tereixa Constenla (pola Asociación de Críticos y Divulgadores de Cómic de España), Josefina Molina (pola Real Academia de Bellas Artes de San Fernando), Pilar Martín (pola Federación de Asociaciones de Periodistas de España), Yanna Gutiérrez Franco (polo Instituto de Investigaciones Feministas da Universidad Complutense de Madrid), Miguel Gallardo (a proposta do ministro de Cultura), e os dous últimos autores galardoados, Rayco Pulido e Pablo Auladell.

  • Múltiples citas de ilustración na Coruña

    Múltiples citas de ilustración na Coruña

    Desde o 1 de agosto desenvólvese na Coruña a Feira do Libro, que acolle moi diversas actividades e presentacións. Presentaron xa as súas novidades os nosos socios Dani Padrón, Xosé Tomás e Alberto Vázquez; a partir de hoxe fan o mesmo ilustradores como Fausto ou Miguelanxo Prado.  Mañá, sábado 4, a partir das 12:00, terá lugar na feira a 2.ª Brincadeira de ilustradoras e ilustradores, que, coordinada por David Pintor, contará coa presenza de Miguel Calatayud, Mariona Cabassa, Noemí Villamuza, Xan López Domínguez, Marc Taeger, Gustavo Roldán Devetach, Lucía Cobo, María Luisa Torcida, Xosé Cobas e María Lires, que participarán ás 18:00 nun debate conxunto. O venres 10 ás 18:00, a nosa socia Paula Mayor prepara a actividade «Collage da Coruña», relacionada co seu libro Coloreando A Coruña. Ao longo de toda a feira asinarán libros ademais os nosos socios Siro, Antonio Seijas e Óscar Villán.

    Ademais, o luns, día 6, comeza tamén a nova edición do festival da banda deseñada Viñetas desde o Atlántico, e á presenza de autores convidados coas súas respectivas exposicións súmanse tamén varias mostras complementarias organizadas por outras entidades. Así, na Galería Monty4 podemos encontrar a titulada Comix Revolution, do noso socio David Rubín, tamén protagonista, xunto con David Aja, da exposición Superpoderes, que ocupa a sede coruñesa de Afundación. No MAC (Museo de Arte Cotemporáneo), pola súa parte, exponse Historietas del tebeo, 1917-1977, que percorre a historia do cómic español baixo o comisariado de Antoni Guiral.

    Ademais, na próxima fin de semana comeza a nova edición do festival de autoedición e BD de autor Autobán, que se desenvolverá o venres 10 na Nave 1839 e o sábado 11 en diversos locais da rúa Orzán e que incluirá unha presentación de proxectos (o «Autobombo»), un Combate de debuxantes, unha feira de fanzines, charlas e mais un taller infantil.

  • Gran presenza galega no Viñetas desde o Atlántico

    Gran presenza galega no Viñetas desde o Atlántico

    Os nosos socios Emma Ríos, David Rubín e Xosé Tomás están entre os autores protagonistas da nova edición do festival da banda deseñada Viñetas desde o Atlántico, que se desenvolverá na Coruña entre o 6 e o 12 de agosto. Entre as exposicións do festival tamén estará a relativa á novela gráfica O corpo de Cristo (Premio Castelao 2017), da nosa socia Bea Lema.

    Os outros autores confirmados para este ano son o tamén galego Tirso Cons, Belén Ortega, Ángel de la Calle, Cristina Durán e Miguel Ángel Giner Bou, José Luis Munuera, Josep Homs, Mamen Moreu e José Ramón Sánchez, un clásico da ilustración española que nos últimos meses presentou a adaptación á banda deseñada da novela Moby Dick.

    A AGPI contará, como vén sendo habitual, cun posto dentro da feira do cómic («Rúa da BD»), situada tamén nos xardíns de Méndez Núñez. Nel poderase acceder a publicacións da asociación e tamén a obras producidas polos nosos socios.

    Cartel a cargo de José Luis Munuera

  • Presenza galega no Concurso de Cómic da Biblioteca Insular de Gran Canaria

    Presenza galega no Concurso de Cómic da Biblioteca Insular de Gran Canaria

    A obra titulada Viento de levante, de Alejandro Galindo Buitrago, obtivo o primeiro premio —dotado con 3000 euros—, na primeira edición do Concurso Nacional de Cómic Biblioteca Insular de Gran Canaria. O xurado do concurso tamén outorgou un segundo premio, de 1500 euros, a La señora Rosa, de Elisa Riera, e un terceiro, de 1000 euros, a Nunca, de Francisco Bilbao e Mayte Gómez. Ademais, foron outorgados nove accésit dotados con 400 euros cada un; nos accésit houbo unha destacada presenza galega, con dous socios da AGPI entre eles: Michel Casado por Hotter tan the Hindenburg; Iago Araújo por Unamunos; Alicia Jaraba por Calcetines; Mayte Alvarado por El barco; Eduardo González por El Mercedes negro; Blanca Santamaría por El semáforo; Laura Pérez por Juega; Arnau Sanz por Selva Negra; e Javier Rodríguez por Working holidays.

    A editorial vasca Astiberri, coorganizadora do certame, publicará as obras gañadoras nun volume conxunto. O xurado desta edición estuvo presidido por Carlos García, e integrado polo editor Fernando Tarancón, os autores Rayco Pulido e Mamen Moreu e a xornalista especializada Tereixa Constenla.

    Á primera edición do Concurso de Cómic Biblioteca Insular de Gran Canaria presentáronse fundamentalmente autores e autoras españolas; Canarias foi a comunidade que máis obras rexistrou, cun un total de 72; seguidamente foron Galicia, cun total de 49, e Madrid, con 39, as seguintes comunidades que más títulos presentaron a esta convocatoria.

     

  • O ciclo Nexos dá protagonismo á BD e a animación

    O ciclo Nexos dá protagonismo
    á BD e a animación

    «O trazo desatado. Banda deseñada e animación en Galicia» é o título da sesión que terá lugar este sábado, 24 de febreiro, ás 12:00, na Biblioteca e Arquivo de Galicia (Santiago de Compostela).

    O ciclo Nexos 2018, que se desenvolve na Cidade da Cultura durante todo este primeiro semestre, combina relatorios a cargo de destacados expertos con actuacións artísticas, «sempre desde un formato didáctico, ameno e distendido». Neste caso, propoñen as charlas de dous referentes da animación e a banda deseñada en Galicia —os nosos socios Alberto Vázquez e Manel Cráneo— e mais un «combate de debuxantes» en que competirán Inés Casarejos, Guille Debelius, Xulia Pisón e Luís Yang, e no que Dani Xove actuará como mestre de cerimonias. A sesión acabará con petiscos cortesía de Pan do Mar e Bodegas Mártin Códax.

    As entradas, de 3 euros, poden adquirirse no Museo Centro Gaiás ou en liña. Podes encontrar máis información sobre o programa e as entradas na web da Cidade da Cultura.

  • Nova edición de Autobom

    Nova edición de Autobom

    Este sábado 1 de abril ten lugar unha nova edición do Autobom, festival de autoedición, en Nave 1839 (Estación de tren de A Coruña).

    Durante ese día terán lugar varias actividades relacionadas co mundo do cómic e ilustración:

    +16:30 – Sesión vermú con música e picoteo.

    +17:30 – AutoLab para realizar cómic experimental e colaborativo.

    +18:30 – Mesa redonda sobre liberdade de expresión no campo da ilustración, con Guitián, Leandro e Sekone moderados por Edu Maroño.

    + 20:00 – Autocine (catro curtos de animación independentes)

    + 21:00 – III Akelarre Mutante: concertos ilustrados de BravuBoy (Pulpiño Viascón) e Strikeback, debuxados por Sara Roca e Álvaro López respectivamente.

    As actividades son gratuítas salvo os concertos, que recibirán un donativo de 5 a 10€ (a recadación será para os grupos e ilustradores).